mánudagur, september 25, 2006

Ég nenni ekki......



Já hún Sigga hún er bara búin að læra trilljón ný orð í leikskólanum - allt í einu segir hún; ég nenni ekki út, ég nenni ekki bað, ógeðslega gott, ógeðslega vont, ógeðslega ljótt, láttu mig vera, ekki stríða, allir saman......... Það er alveg frábært að fylgjast með litla unganum sem núna er svo ánægð með leikskólann að hún varla hefur tíma til að kveðja foreldrana á morgnanna. Þegar hún er sótt þarf oft að bíða því hún er bara ekki alveg búin að púsla auk þess sem hún þarf að sýna margt. Í dag blasti við fögur sjón - Sigga var að leika við vinkonu sína úti, þær hlupu um allt svæðið og hlógu saman - þetta hefur hún ekki gert hingað til. Er ekki gaman að fá að upplifa þetta allt með henni Siggu Báru sjarmörínu línu?
Bless í bú

miðvikudagur, ágúst 30, 2006

Þetta er allt að koma



Já hún Sigga er öll að koma til. Stúlkan er búin að vera lasin meira eða minna síðan á laugardag með hita, hálsbólgu og almennt kvef eins og það gerist best. Í dag var því farið í leikskólann í fyrsta sinn í þessar viku og hélt mamman að við færum 8 skref afturábak í aðlöguninni. En viti menn - það þurfti ekki að hafa áhyggjur af þessum degi. Þegar Sigga Bára var sótt í leikskólann í dag fékk mamman gleðifréttir - STÚLKAN SVAF Í HVÍLDINNI, BORÐAÐI VEL OG NÁÐI AÐ LEIKA SÉR!! Getur maður beðið um annað. Við foreldrarnir vitum vel hvað býr í þessari duglegu stúlku og hlökkum mikið til þegar kennarar hennar fara að sjá þá hlið á henni. Annars þá verð ég að taka hattin ofan fyrir kennurum Siggu Báru - þær hafa verið svo góðar og þolinmóðar við okkur, þá ekki síður foreldrana en Siggu Báru. Við segjum bara takk, takk, takk fyrir allt.
Hér eru myndir af fallegasta sjúklingi kjúklingi landsins og barasta heimsins
Bless í bú

sunnudagur, ágúst 20, 2006

Vikan búin og næsta að hefjast




Já vikan sem er að líða gekk vel hjá Sigríði Báru - að frátöldum þeim klukkutímum sem hún grét í leikskólanum. Já hún hefur ekki alveg brosað hringinn allan daginn þessa dagana - það er gaman að leika sér með krökkunum, gaman að borða með krökkunum, gaman að labba í skólann á morgnanna en EKKI AÐ FÁ SÉR LÚR. Okkur skilst að þrátt fyrir allar heimsins aðferðir til að fá unga til að taka lúrinn hafa engar þær haft áhrif á Siggu Báru - hún grætur og grætur og grætur þessi engill en hættir um leið og farið er út að leika. Sigga Bára er sem sagt mjög þrjósk - það vitum við foreldrarnir líka og það er einmitt þannig sem við viljum hafa hana Siggu Báru - þrjóska og með skap - það verður bara enn meiri sigur þegar maður hefur unnið hana á sitt band.
Sigga Bára tók sig til allt í einu á föstudaginn eftir skóla, skellti sér á fjórar fætur og lyfti annarri upp og kallaði "sjái sjái latibær" Svo dró hún okkur gömlu á gólfið og allir farnir í Latabæjar stuð eins og henni einni er lagið!!!

En ljósið sefur núna ljúfum svefni enda búin að hafa nóg að gera í dag. Farið var í Grafarholtið til móðursystranna og farið í góða göngu um holt og hæðir. Það finnast ber í Reykjavíkinni góðu en hvar segjum við ekki :-D
Bless í bú
gydao@simnet.is

sunnudagur, ágúst 13, 2006

Bíddu - hef ég ekki verið hér áður???




Fyrsti leikskóla dagurinn var nú eiginlega þannig að það var eins og Sigga Bára hafi verið þarna áður. Sú stutta gekk inn eins og hún ætti skólann, ekkert sjálfsagðara en að hengja upp úlpuna og töskuna á nýja kisu snagann og tölta sér inn á ganginn. Á móti okkur tók Sigrún skólastjóri og þær Sigga Bára skoðuðu fiskabúrið sem hefur fjársjóð á botninum!!!!! Svo hittum við hana Láru sem er svo indæl og þær Sigga fengu sér síðar labbitúr og leiddust hönd í hönd. Svona til að gera langa sögu stutta þá fór Sigga Bára að gráta þegar móðirin þurfti að fara með hana heim!!!! Svona var þetta nú - svo héldum við upp á daginn með því að fara í bakaríið og fara með skúffuköku til ömmu og afa - Sigga Bára var orðin stór stelpa.
Takk fyrir kveðjurnar kæru vinir - það er svo gaman að lesa orðsendingarnar frá ykkur!!!
Bless í bú - á morgun verður snæddur morgunmatur með öllum krökkunum ............

fimmtudagur, ágúst 10, 2006

Það verður leikskóli á morgun



Já núna fer að styttast óðum í að litla daman labbi sér yfir götuna og byrji á leikskólanum. Á morgun er fyrsti aðlögunar dagurinn og mikil spenna búin að magnast hér á heimilinu bæði hjá Siggu Báru og foreldrunum. Við erum viss um að þetta gangi vel þar sem Sigga Bára hefur fengið að fara nokkrum sinnum út að leika þegar leikskólinn er með útiveru á morgnanna. Sigga Bára hefur meira að segja ekki alltaf viljað fara heim með þeirri gömlu heldur viljað fara beint inn að leika!!!!!
Annars hefur ágúst mánuður einkennst af miklum heimsóknum út á land. Við eyddum nokkrum dögum í sumarbústað með Bínu, Olgu og stórfjölskyldum sem var hreint út sagt frábært auk þess sem við fórum í heimsókn til ömmu, afa og Sigga Val þar sem þau voru í bústað. Auðvitað var svo farið á tónleika með Stuðmönnum um verslunarmannahelgina. Sigga Bára sofnaði að vísu yfir honum Valgeiri en ..............
Jæja látum þetta nægja í bili
Bless í bú!!!!!

mánudagur, júlí 31, 2006

Stórafmæli haldið hjá Söru og Sigrúnu TAKK



Foreldrar Siggu vita mæta vel að þau hafa ekki verið dugleg að skrifa upp á síðkastið. Ástæður eru margvíslegar og margar - aðallega þær að við höfum verið mikið iðin við að fara í stutt ferðalög, hitta vini og njóta síðustu daga Siggu Báru og mömmu í barnsburðarleyfinu.
Sigga Bára og fjölskylda fóru í frábæra veislu um helgina til Söru og mömmu hennar. Þar mættust allar stelpurnar úr hópi 12 og héldu upp á afmælin sín eins og þeim einum er lagið. Mæting kl. 15 og farið heim 21 - sannkölluð partýljón!!!! Þetta var hreint út sagt frábær veisla og allir, þá aðallega afmælisbörnin, voru í svo góðu skapi að það hálfa hefði verið nóg. Þær voru duglegar að leika saman úti, meira en venjulega, mikið búnar að þroskast og svo er ein hætt að nota bleyju!!!!! Já svona eru þetta flottar stelpur. Við viljum bara nota tækifærið og þakka öllum vinum okkar fyrir þennan frábæra dag saman og vonandi hittumst við fljótt aftur.
Núna eru bara 10 dagar þar til Sigga Bára byrjar á leikskólanum - hún segist bara hlakka til og kveður mömmu stundum á daginn, þykist labba út um dyrnar og segir " Bess mama e farin leiskolan" - púff og sjúkk
Bless í bú

mánudagur, júlí 10, 2006

Eitt ár liðið






Það er í eitt ár liðið frá því við fengum sólargeislann í lífi okkar. Lítill ungi sem saug fingurna, strauk vinstra eyrað sitt og grét. Mikið var lagt á hana Siggu Báru þennan dag fyrir ári síðan, meira en okkur getur grunað. Hún grét allan þennan dag en leyfði okkur að halda á sér, hún gat gleymt sér við að maula mat í stutta stund en áður en við vissum af kom gráturinn aftur og benti hún á hurðina – út vildi hún. En það hefur mikið vatn runnið til sjávar og gráturinn hefur breyst. Í dag grætur Sigga ef hún fær ekki sínu fram eða grætur vegna þess að við erum ekki hjá henni. Það er stór munur á þeim gráti í Kína. Elsku litla Sigga hefur vaxið og dafnað. Hún hefur glatt hjörtu margra en þó mest foreldra sinna. Takk fyrir þetta fyrsta ár kæra dóttir – fyrst við gátum þennan dag í fyrra getum við allt saman ;-)

sunnudagur, júlí 09, 2006

Fyrsta/Frysta útilegan



Sigga Bára hefur farið í sína fyrstu útilegu. Það var löngu ákveðið að fjölskyldan ætlaði sér að fara á útilegu Íslenskrar Ættleiðingar sama hvernig veðurspá yrði. Þetta var frábær ferð, fórum samferða Matthildi og fjölskyldu og hittum fullt af skemmtilegu fólki . Við tjölduðum við skólann á Reykhólum og þar var öll aðstaða til fyrirmyndar stórt leiksvæði fyrir ungana að hlaupa á, gæsluvöllur fyrir neðan húsið, leikfimissalur sem var fullnýttur allan tímann og frábær aðstaða inn í skólanum(stærðar matsalur, eldhús, sjónvarpskrókur og salernisaðstaða). Veðrið var ágætt og þó..... há sumar og ábyggilega rúmlega 4 stiga hiti og talsverð rigning allan tímann, það var nátturulega "bara skítkalt" alla vega fyrstu nóttina. Talið var að hátt í 150 manns voru á svæðinu þegar leikar stóðu sem hæst og rífandi stemming. Þegar fjölskyldan hafði verið á Reykhólum frá föstudegi fram á laugardagskvöld var ákveðið að kveðja þennan fallega stað. Það hafði verið svo kallt fyrstu nóttina að við hreinlega lögðum ekki í aðra nótt með prinsessuna í tjaldið. En mikið var gaman og viljum við þakka öllum fyrir frábæra skemmtun og samveru.

sunnudagur, júlí 02, 2006

Orðin fullorðin eins og Fríllinn


Já núna er Sigga Bára búin að ná því að vera tveggja ára og okkur foreldrunum finnst eins og við höfum séð hana breytast á einum sólarhring ( svona næstum). Við skelltum okkur eftir afmælið í smá ferðalag til Stínu, Kalla og Valentínu en þau eiga hreint yndislegan bústað í Grímsnesinu. Þar var tekið höfðinglega á móti okkur svo vægt sé til orða tekið og fólk sem þekkir okkur veit að ef okkur líður vel einhverstaðar förum við seint þaðan og upplifðu gestgjafar okkar það - komum ekki í bæinn aftur fyrr en um miðnætti!!!!! Við vorum úti í náttúrunni, skelltum okkur í laugina, borðuðum góðan - frekar bestan mat framreiddan af fagfólki og nutum félagskaparins. Takk fyrir okkur vinir ;-)

En daginn eftir var okkur svo boðið aftur í gill - í þetta sinnið til Sunnu, Sölku, Dóru og Styrmis!!! Þar svignuðu borðin undan kræsingum sem Dóra (ég meina þetta Dóra !!) hafði útbúið en litla fallega Sunna hafði verið skírð á laugardeginum og slegið því saman við afmælið hennar. Þarna mættu allar kínasystur fyrir utan Stínu mína sem var upptekin í bústaði foreldra sinna. Mikið er gaman að sjá þessa litlu unga okkar og breytingarnar sem hafa orðið á þeim. Hver annari fallegri, hver annari sjálfstæðari, hver annari blíðari og hver annari yndislegri. Já mikið erum við öll rík. Takk fyrir heimboðið fjölskylda - það er alltaf svo gott að koma til ykkar. Annars hafa undanfarnir dagar einkennst af tíðum sundferðum okkar, við höfum örugglega öll verið selir í fyrra lífi því dagurinn er ekki fullkomnaður nema við séum aðeins búin að kíkja í laugina. Sigga er mikið núna að leika sér í tjaldinu sem hún fékk í afmælisgjöf og hafa frændsystkini hennar verið dugleg að koma og leika með henni í því.
Næst á dagskrá er útilega Íslenskrar Ættleiðingar - veðrið getur ekki versnað þannig að maður segir bara eins og Lúðvík í Samfylkingunni talaði um gengi flokksins - "Ef maður er kominn á botninn er bara ein leið upp"

Bless í bú

laugardagur, júní 24, 2006

Hún Sigga Bára Min á afmæli í dag




Elsku hjartans dóttir okkar á afmæli í dag og er orðin tveggja ára!!!!! Foreldrarnir eru núna að bíða eftir því að gestirnir banki á dyrnar - stoltir og ánægðir. Hún Sigga Bára fattar alveg að hún á afmæli - búin að opna nokkra pakkana og fengið s.s. vörubíl (frá Þórhildi feminista), útilegustól, garðáhöld og ekki má gleyma stóra sandkassanum sem afi og amma gáfu prinsessunni af tilefni dagsins.
Til hamingju með daginn hjartans dóttir okkar!!!!!!!

fimmtudagur, júní 22, 2006

Komin heim





Fjölskyldan er komin heim úr sumarfríinu. Við skelltum okkur til Ítalíu í tvær vikur og dvöldumst þar ásamt Palla og fjölskyldu á yndislegum stað í Toscana héraði. Hitinn var góður og naut Sigga þess að vera léttklædd, skoða maurana, eðlurnar og svo auðvitað að borða kirsuber - þau voru í miklu uppáhaldi. Við létum ekki staðar numið þar og heimsóttum vinkonu okkar hana Ágústu, Floris manninn hennar og yndislegu dóttur þeirra hana Katrínu Ágústu. Þau búa semsagt í Amsterdam og fengum við frábæra leiðsögn um borgina, fórum á markaði en toppurinn í ferðinni fyrir hana Siggu var dagur sem farið var í fallegan garð þar sem hún fékk að fara á hestbak - ekki bara einu sinni - nebb - hún fékk að fara tvisvar eftir að hafa sannfært pabba sinn um það. Hún vissi að hún var eins og Lína eða LUWE eins og hún ber það fram af miklum krafti. Sigga hefur engu gleymt frá síðustu flugferðum var eins og ljós - eða réttara svaf eins og ljós í öllum þeim flugum sem við fórum í. Þetta var sem sagt draumur í dós enda ekki annað hægt með svona líka frábæra ferðafélaga þau Palla, Höllu, Védísi og Steinunni Völu - takk fyrir okkur!!!!
Jæja látum þetta duga í bili
Bless í bú
gydao@simnet.is

fimmtudagur, júní 01, 2006

Eitt ár liðið frá því við fengum myndirnar!!!




Hugsa sér að það sé liðið eitt ár síðan við Kalli fengum upplýsingamyndirnar frá Kína af henni Siggu Báru okkar. Við erum að tala um 365 daga sem hafa liðið ótrúlega hratt en einhvernveginn samt svo langt síðan því okkur finnst hún Sigga hafa verið með okkur alveg frá upphafi. Við erum þakklát fyrir að lífið hafi verið svona gjafmilt og leitt okkur öll saman . Hér eru myndirnar frá því fyrir akkúrat einu ári síðan og svo dömunni í dag. Þú ert best Sigga Min!!!

mánudagur, maí 29, 2006

Sauðburður yfirstaðin og Björn bóndi kominn í borgina



Sigga er búin að vera mjög dugleg frá síðustu skýrslu hér á síðunni. Hún fór nefnilega í sveitina og fékk að fylgjast með nýfæddum lömbum - gaf þeim meira að segja nebbaknús sem ekki allir fá frá frökeninni. Það var tekið á móti okkur á Hvammi í Landsveit eins og höfðingjum hjá Pálma og fjölskyldu - þúsund þakkir fyrir okkur kæra fjölskylda.
Nú síðan liðu dagarnir og kosningar voru á næsta leiti. Hann Hemmi frændi hennar Siggu var í framboði fyrir Vinstri græna og tókst honum að snúa öllum í fjölskyldunni sér í hag og vann flokkurinn mikin sigur - til hamingju Hemmi frændi :-) Við tölum svo ekki um nýmyndaða borgarstjórn þar sem það á ekki heima hér á síðu fallegrar stúlku.
Svo verður að minnast á heimsókn í nýja húsið hennar Elvu Gests en það var svo gaman að heimsækja hana og Heiðrúnu vinkonu sem er að bíða eftir að lítill ungi komi í heiminn ;-) Spennandi Heidi eða hvað!!!!
Nú pabbi hennar Siggu Báru er að útskrifast á laugardaginn og erum við að hefjast handa við að undirbúa móttöku hér á bæ - Sigga Bára er búin að vera svo dugleg að vinna í garðinum og er hann bara orðinn flottur hjá henni. Mamma er ánægð með skottu.
Jæja höfum þetta ekki lengra í bili og takk fyrir allar kveðjur kæru vinir!!!!!!
Bless í bú

mánudagur, maí 15, 2006

Núna er það bara hjóla, hjóla og hjóla



Já hún Sigga Bára fékk að upplifa um helgina að sitja aftaná hjólinu hennar mömmu og var það gleði, gleði, gleði, gleði alla tíð................ Hún er annars að þroskast mikið eða bara góð að herma efitr því um leið og þau gömlu segja "jæja það eru að koma fréttir" rýkur hún af stað skríður upp í sófa á besta staðinn og liggur þar og flatmagar og segir "frétttir"!!!!!
Í dag var farinn maraþon hjólreiðahringur með þeim mæðgum Kristínu og Matthildi sem endaði þannig að dæturnar ákölluðu kerrurnar sínar og þegar heim var komið og kerrurnar komnar í augsýn komu tár á hvarma og þær hlógu uppgefnum hlátri - jú hviss og bang sofnaðar á nóinu.
Jæja höfum það ekki lengra í bili
Bless í bú

föstudagur, maí 12, 2006

Cherry blossom eða hérumbil





Við mæðgur fórum í morgun snemma út að labba - það var svo fallegt veður - en kalt. Við mælum með því að fá sér göngutúr í Grasagarðinn þar sem tré eru farin að blómgast og mannlífið með. Kellurnar tvær tóku með sér nesti og settust inn í tjaldið stóra í Húsdýragarðinum lásu Moggann og spjölluðu. Núna er litla daman sofandi og mamma að fara að mannna sig upp í að vekja hana, því það er sama hve blíðlega við foreldrarnir vekjum hana þá er mín alltaf stúrin svona fyrsta stundarfjórðunginn eða svo!!!!
Bless í bú

mánudagur, maí 08, 2006

Pikknikk



Í dag fór Sigga eldsnemma í mjólkumjaltirnar í Húsdýragarðinn með pabba sínum. Kom svo alsæl heim og uppgefinn. Eftir lúrinn var haldið aftur af stað í dalinn en þar hittust nokkrar Kínasystur úr hópi 12 og höfðu með sér nesti - jú pikknikk var það. Mikið er gaman að vera með þessum frábæru stelpum og upplifa vorið með þeim!!!! Þegar maður byrjar verður að halda áfram ekki satt!!!! Ekki var hægt að skilja fulgana útundan og fengu þeir brauðið sitt og svo fengu bæði mæðgur og dætur sér sundsprett í Laugardalslaug.
Lífið er yndislegt ..........................................
Bless í bú

laugardagur, maí 06, 2006

Vorið er komið



Mikið er nú skemmtilegt þegar vorið kemur. Tvær stórar frænkur voru í næturgistingu og ekkert smá gaman að fylgjast með öllu sem þeim datt til hugar. Eftir skemmtilegt kvöld sofnuðu þær frænkurnar undir meistarastykkinu um súkkulaðiverksmiðju Kalla og vöknuðu kátar og hressar í morgunverkin. Þá fórum við öll í laugina þar sem Sigga Bára var á heimavelli og naut sín reglulega vel enda orðin mikil sundgarpur. Eftir lúrinn var farið í Hreyfiland þar sem við hittum fullt af skemmtilegum krökkum og nutum þess svo vel að hoppa og skoppa og síðan er ekki slæmt að eiga þokkalega útisinnaða foreldra því eftir garðskoðun hjá frænkunum í Grafarholtinu þá tóku við garðverkin með Pabba þar sem við byrjuðum vorverk og lögðum línuna fyrir næstu daga. Sigga Bára er alveg klár á því að þegar kjóll eða skokkur er dreginn fram þá er afmæli í gangi. Svo mikið hefur verið í gangi að undirbúa afmælin undanfarið að Sigga Bára er búinn að syngja afmælissönginn í tíma og ótíma. Foreldrarnir voru hálf vandræðanlegir þegar nágrannar fóru að óska okkur til hamingju með afmæli hennar og þurfti smá útskýringar um að söngurinn hjá SBM væri bara undirbúningur fyrir afmæli hennar í sumar, en ætti ekki við rök að styðjast. En kvöldið endaði síðan með skemmtilegu kvöldboði hjá Palla og Höllu þar sem undirbúningur var hafinn fyrir Ítalíuferðina í sumar. Ammmalída

fimmtudagur, maí 04, 2006

Bólusetningar loksins búnar - í bili


Í dag lauk bólusetningum í bili hjá Siggu Báru og eru bæði foreldrar og hún mjög fegin. Hún lagði glöð í bragði af stað upp á heilsugæslu mjög stolt, leiðandi hann Níels apa. Svo þegar búið var að mæla hana og vigta leist henni ekki á blikuna - svo stungan - ég ætla ekki að lýsa augnaráðinu sem barnið gaf móður sinni. En við sluppum lifandi frá Krisínu frábæra hjúkrunarfræðingnum sem hefur fylgt okkur í gegnum þetta allt saman. Að því loknu fór Sigga með baukinn sinn í bankann og fékk "æmmælisgjöööö" var mín ánægð eða hvað. Fékk kúta sem við ætlum að fara með í sund á eftir!!! Smá statistik - Sigga er núna 10, 4 kg og 82, 5 cm en þegar hún kom til landsins þann 20. júlí sl. var hún 7,7 kg og 71 cm. Drottningin......................bara blómstrar.
Bless í bú

mánudagur, maí 01, 2006

Fyrsti maí og maður bara mokar og mokar



Hæ hó jibbý jei og jibbý jei það er kominn fyrsti maí!!!! Mikið er nú gaman þegar fjölskyldan fær svona auka dag og getur notið hans í þvílíkri veður blíðu í Garðabæ á ylströndinni. Við höfum eytt síðustu tveimur dögum þar að moka, láta bát sigla í litlum læk og skoða fallegar skeljar sem eru þar í þúsundatali. Amma hennar Siggu Báru og afi búa þarna rétt við ströndina og njótum við þess að koma þangað, fara út og svo heim þar sem afi og Siggi frændi hafa útbúið eitthvað gómsætt!!! Heppin eða hvað?
Þar sem mamman er að jafna sig eftir bruna er lítið um sundferðir þessa dagana/vikurnar og biðjum við því að heilsa sundfélögugum okkar sem munu hittast á morgun í Salarlaug - hugur okkar verður hjá ykkur :-(
Bless í bú

þriðjudagur, apríl 25, 2006

Hjálmurinn kominn á kollinn


Jú það var á sunnudaginn sem litlu dömunni datt í hug að það væri nú kannski í lagi að prufa þennan hjálm - það var svo ekkert slæmt. Það sést vel á myndinni hvað pabbinn var stoltur þar sem hann hefur verið sveittur við að prufa ýmiskonar ráð til að fá hana Siggu Báru til að nota hjálminn. Í dag hefur hún farið út að hjóla nokkrum sinnum og berst ekkert gegn því að setja hjálminn á sig - við krossum bara fingurna og vonum að það breytist ekki!!!

föstudagur, apríl 21, 2006

Forvarnarfulltrúi og barnið sem ekki vill hjálminn!!!


Gleðilegt sumar!!!! Sigga Bára sést hér á myndinni nývöknuð með sumargjöfina sína. Hún fékk þríhjól sem hún er voða hrifin af og hefur verið dugleg að hjóla á því úti sem og inni. Það er bara eitt lítið en samt stórt vandamál - hún neitar algjörlega að setja á sig fallega Bangsimon hjálminn!! Pabbinn er varla vaknaður og skellir á sig hjálminn áður en hann eldar grautinn til að sína dóttur sinni að það er cool að vera með hjálm en sú stutta er lítið að fyrir það að fylgja tískunni og stendur fast við sitt - ENGAN HJÁLM TAKK!! Kannski finnst henni bara ekki cool að vera eins og pabbi eða ..........
Ekki veit ég hvaða trix lögreglan mun nota næst til að telja dömunni trú um að hjálminn verður hún að hafa til að getað hjólað úti en því get ég lofað ykkur að það verður fest á filmu og sett hér inn!!!!!
Bless í bú

miðvikudagur, apríl 19, 2006

Sólríkir dagar


Það er búið að vera svo gott veður hér í höfuðborginni undanfarna daga og hefur Sigga Bára því verið úti við frá morgni til kvölds. Í gær vorum við svo heppnar að Þórey og Þórdís stóru frænkur eyddu deginum með okkur. Það var farið í Laugardalinn og öndunum gefið brauð, svo á róló og heim að borða. Þórhildur frænka kom við og fékk sér kaffi og sá stelpunum fyrir skemmtun á meðan mamma og Sigga Bára lögðu sig. Eftir hádegi var farið í Vesturbæjarlaug en þar hittist sundhópurinn mikili frá sundnámskeiðinu - en mikið söknuðum við Önnu Kristínar og Ragneiðar. Vonandi koma þær næst en þá verður hist í Grafarvogslaug ;-) Svo enduðum við þennan fallega dag í bestu ísbúð bæjarins í Vesturbænum mmmmmmmmmmmmmm. Á morgun er svo sumardagurinn fyrsti og þá ætla allar Kína dömur á landinu að hittast í Fram heimilinu og heilsa upp á kínverska sendinefnd frá CCAA og hvor aðra.
Þar til næst
Bless í bú

föstudagur, apríl 14, 2006

Ljósmyndafyrirsæta


Í gær var loksins riðið á vaðið og Aldís ljósmyndari mætti á svæðið og tók myndir af prinsessunni. Við höfum verið að trassa það að láta fagmann taka myndir af heni og vorum farin að hræðast það að ekkert yrði gert fyrr en á fermingardaginn hennar Siggu Báru- en hjúkk og púff og sjúkk þetta hefur verið gert og lítur vel út. Sigga Bára var bara alls ekkert feimin við hana Aldísi sem kom hingað heim og leyfði Siggu Báru meira að segja að taka nokkrar myndir. Hún Aldís er sannkarlaður proffs. Svo var farið í afmælisveislu til Sigga Vals en ykkur að segja þá er hann Siggi frændi ekta veislu maður því þetta var önnur veislan hans í tilefni af afmælinu þetta árið. Eftir að hafa borðað vel þar á bæ löbbuðum við í kirkjugarðinn og settum páskaliljur á leiði ömmu Gunnu og afa Olla og héldum svo heim á leið. Um kvöldið var svo farið í grill til Olgu frænku og haldið þið að Sigga Bára hafi verið þreytt eftir daginn? Já, hún vaknaði kl. 9 í morgun og hefur verið værukær í náttfötum að leira og leika við pabba sem er enn í náttfötunum núna kl. 12!!!
Bless í bú

miðvikudagur, apríl 12, 2006

Kiðlingar, lömb og Sigga Bára


Halló vildum bara láta alla vita að það var æðislegt í Húsdýragarðinum. Það eru þrír sætir kiðlingar fæddir og fengum við að klappa þeim. Þeir voru svo gæfir og mjúkir að okkur langað mest til að halda á þeim heim. Svo voru líka tvö lömb fædd í fyrradag sem voru ekki síður gæf og lölluðu sér til okkar til að láta knúsa sig. Svo klikkar ekki að enda góða ferð á kaffihúsinu og fá sér heitt kakó og skúffuköku ( með rjóma)!!!!!
Settum nýjar myndir inn á albúmið.
Bless í bú

þriðjudagur, apríl 11, 2006

Allir í fríi


Þessa dagana er gaman að vera til og fullt að gera, eiginlega pínu upphitun fyrir sumarið. Þannig er að Sigga á tvær móðursystur sem eru kennarar og núna eru þær báðar í páskafríi og hafa litið við í heimsókn og við til þeirra auk þess sem ein móðursystirin er að vinna vaktavinnu og er mikið heima þessa dagana - þetta er bara ein stór hátíð!!! Svona verður sumarið systurnar með ungana að leika !! Sigga er semsagt mikið að hitta fjölskylduna sína þessa dagana og er stefnan sett á húsdýragarðinn á eftir með frændsystkinum að skoða nýfædda geita unga - góð íslenska væri auðvitað að skoða nýfæddu kiðlingana en ekki "geitungana"!!!!!!!! Jú það er líka búið að vera gaman hjá henni í fermingum - fjórar að baki og tvær eftir. Síðasta ferming var hjá Steinunni Völu stóru frænku sem var svo falleg og fín í fermingarkjólnum og með nýju hárgreiðsluna. Því miður gleymdum við myndavélinni heima og því eru ekki til neinar myndir frá þeirri stórveislu.
Setjum inn myndir af geitungaferðinni inn á apríl albúmið.
Bless í bú

mánudagur, apríl 03, 2006

Fermingarvertíð hafin



Já hún Sigga er mikið bókuð þessa dagana og sér hún varla fram úr fermingarveislu flóði þessa árs. Hún fór í sína fyrsu fermingarveislu hjá honum Gunnari Agnars Margrétarsyni. Hún var að vísu látin halda að hún væri að fara í afmæli því það finnst henni voða gaman og hlakkaði henni mikið til að fara í þessa "ammæli" veislu. Þar sem það var síðasti skóladagur föðursins og vinkonu hans (Eddu Huld) vorum við svo heppnar að fá skemmtilega fylgdarfjölskyldu með í veisluna- engann annan en Kobba (manninn hennar Eddu) og börnin þeirra tvö. Sigga var að lita mestan part veislunnar ( móðir fermingarbarnsins er nefnilega kennari og veit hvað þarf að hafa fyrir börn í veislum - húrra ) og hesthúsaði ekki minna en 5 upprúlluðum pönnukökum ( nei hér er ekki verið að ýkja). Svo var hún farin að kunna svona vel við sig í afmælisveislunni að mín tók sporið og dansaði nákvæmlega eins og amma er búin að kenna henni (þið sem hafið séð það vitið hvernig sá dans er og geri aðrir betur). Þegar þessari gleði lauk var brunað heim og haldið áfram að fagna - en pappinn var búinn í skólanum og var því skálað af tilefni dagsins með ömmu, afa og foreldrunum. Afi og amma fóru svo með dömuna út að borða með frændsystkinum og enduðu skemmtiferðinni í Perlunni að borða ís. Já hún er heppin þessi dama að eiga ömmu og afa með orkuna í botni og alltaf til í stuð og endalaust stuð. Foreldrarnir fóru nefnilega út að fagna með skólafélögum Kalla. Þegar heim var komið var tátan sofnuð í SÍNU rúmi og allt "under control" hjá Ernu og Val. Það er ekki hægt að segja bara sannleikan hér : foreldrarnir voru ánægðir með hvað Siggu líður vel hjá ömmu og afa en um leið pínu svekkt yfir því að hún grét ekkert yfir því að við værum ekki heima!!!! Hún er orðin svo örugg með ömmu og afa sem við erum mjög þakklát með.
En nóg um það hennar bíður þrjár veislur til viðbótar og Sigga er til í fjörið með taktana tilbúna til að tjútta.
Bless í bú

þriðjudagur, mars 28, 2006

10 kílóa múrinn rofinn


Í dag var merkisdagur hjá Siggu Báru en við fórum í sund seinnipartinn í dag með sundfélögum úr hópi 12. Það er fastur liður áður en farið er út í laug að skella dömunum á vigtina og svo er mikið spekúlerað í þyngd hverrar og einnar. Sigga hefur verið sú eina sem ekki hefur komist í tveggja stafa tölu en það gerðist í dag - ekki lengur níu komma eitthvað heldur hreint og flott 10 hvorki meira né minna!!!!! Varð bara að skrásetja þetta hér á þessa síðu svo við gleymum ekki þessum degi. Það var svo haldið upp á þetta með því að fara í Vesturbæinn eftir matinn í þá bestu ísbúð í Reykjavík og keyptur "gamli ísinn" og heit karamellusósa to go!!!
Sigga er svo sofnuð núna kannski tíu komma eitt (eftir ísinn)
Bless í bú
Gyða

fimmtudagur, mars 23, 2006

Fimmtudagar eru aktivitet dagar


Jú dagurinn í dag var kraftaverk eins og allir aðrir dagar. Hún Sigga er kúrari og þarf svona að liggja og kúra í hálfa klukkustund áður en litlir fætur eru tilbúnir að snerta kallt parketið. Hver man ekki eftir því þegar maður var lítill hve gólfið var oft kallt. Nema við tók að setja Línu tígó í hárið og undirbúa sig fyrir komu ömmu og afa. Þau eru svo skemmtileg þessi afi og amma sem Sigga á að það hálfa væri nóg. Þau hitta snúllu á hverjum fimmtudagsmorgni og gera eitthvað skemmtilegt með henni. Í dag var farið í Grasagarðinn og öndunum gefið að borða. Því næst var labbað í Húsdýragarðinn og heilsað upp á Snorra sel og fleiri kunningja. Þessu lauk svo með góðri heitri súpu á veitingarstað Húsdýragarðsins en þar sér um matseldina hann Óli kokkur og klikkar hann aldrei. Við fórum svo í okkar síðasta skipulagða Ungbarnasundtíma á Reykjalundi. Það var skrítið að þessi fasti punktur í tilverunni væri horfinn - allaveganna í bili. Mæðgurnar höfðu í nóg að snúast og brunuðu því næst í Ingunnarskóla þar sem frænkur okkar voru með nemendasýningu - Afríku þema. Mikið gaman að fylgjast með vinnunni þeirra í skólanum. Eftir það var farið í mat til Bínu frænku og voru það þreyttar mæðgur sem brunuðu aftur í borgina nokkrum tímum síðar.

Bless í bú

miðvikudagur, mars 22, 2006

Aldursforseti


Sigga Bára og móðir ákváðu að skella sér á mömmumorgun í frábæru kirkjunni okkar í morgun. Það var gaman að hitta þessar hressu mömmur og ungana þeirra. Sigga var nú samt aldursforsetinn þarna og fékk því að ráða svolítið miklu hvaða kubba hún léki sér með og hvaða dýr ættu að vera hjá henni, eðlilega!!! Svo var farið heim að borða og út í kerru að sofa á meðan mamman labbaði með ungann sofandi. Sigga vaknaði svo ekki fyrr en eftir langa göngu, við kvakið í gæsunum í Grasagarði - það er alltaf jafn gaman að skoða fuglana. Hún er núna með mikið Línu æði og vill bara hlusta á Línu í bílnum sama lagið aftur og aftur og aftur og aftur. Klappar og lætur apann sinn dansa með. Mamman er ánægð með það þar sem Lína er hennar uppáhald og mun hvetja hana til ýmissa prakkarastrika í framtíðinni - já varið ykkur bara ;-)
Bless í bú og von bráðar munu birtast safnalbúm með mánuðunum.
Línu kveðjur
Sigga og Gyða

mánudagur, mars 20, 2006

Halló Heimur



Halló heimur!!!

Sigga Bára Min vildi bara segja halló og láta vita að hún vex og dafnar hjá mömmu og pabba. Daman hefur ekki bara stækkað heldur þroskast mikið og er farin að tala heljarinnar ósköp. Hún er félagslynd og elskar að vera úti að leika sér. Ekki leiðinlegt fyrir mömmu og pabba sem elska að vera úti að dundast. Hver veit nema við förum að endurlífga þessa síðu en í dag eru 8 mánuðir frá því að fjölskyldan kom heim frá Kína.

Bless í bú

mánudagur, ágúst 15, 2005

Garðvinna, kínasystur og klipping

Myndir
Ungfrú Sigríður Bára tók sig til og aðstoðaði foreldra sína við garðvinnu fyrr í vikunni. Sendi reyndar lofthræddan og aldraðan föður sinn upp á húsþak að mála og veifaði honum af og til svona rétt til að telja í hann kjark. Þá fannst henni móðurin ekki týna grasið nægjanlega hratt úr beðunum svo hún borðaði slatta til að auka yfirferðina svo allur dagurinn færi nú ekki í svona verkefni. Henni fannst þetta nokkuð gaman en skemmtilegra er þó að sitja í kerrunni og horfa á heiminn og hver getur ekki tekið undir það?
Hún er orðinn ótrúlegur orkubolti og foreldrarnir þurfa að hafa sig alla við til að annast hana. Sigga Bára vill helst ganga ( með aðstoð) um alla íbúðina, aftur og aftur og bendir síðan á það sem henni líst best á hverju sinni og vill skoða nánar. Bognir í baki en með viljann fyrir verki eru vaktaskipti hjá þeim "gömlu" til að allt sé nú gert eftir "pedagoginu"
Í dag hittum við síðan kínasystur hjá Matthildi í Mosanum og það var gleðistund og gaman að sjá hversu miklar framfarir eru hjá þeim öllum. Hafa mikið stækkað og styrkst auk þess að luma á einu og einu nýju "trixi" sem sjálfsagt er meira fyrir egóið hjá okkur foreldrunum en mat á þroska stúlknanna.
Nú á leiðinni heim var farið í fyrstu klippinguna sem tókst vel, ekkert væl eða neitt heldur bara góð fagmennska hjá þeim í stubbalubbum í Grafarvoginum

mánudagur, ágúst 08, 2005

Örugg stjórn á Hofteignum

Myndir
Óhætt er að segja að það sé fjörugt lífið á Hofteignum og enginn vafi hver ræður þar ríkjum. Ungfrú Sigríður Bára Min hefur tekið við stjórnartaumum og heldur fast um þá og örugglega. Svefn og vaka á bænum fer eftir hennar ákvörðun og tekur þá jafnt til hennar og foreldrana sem snúast í kringum þá stuttu enda ekki annað hægt. Við höfum fengið mikið af heimsóknum en við fylgjumst vel með þegar við sjáum þreytumerki á henni því ekki má fara of hratt í hlutina til að þetta aðlögunarferli verði sem best.
Við vorum að skoða eldri myndir af Siggu og sjáum að hún hefur dafnað mikið og þyngst enda mátti hún við því. Einn frændinn sem kom á matmálstíma missti út úr sér að "það væri eins og að koma á Múlakaffi" að lenda hjá okkur í hádeginu. Þá var á boðstólum, grautur, lifrapylsa, rúgbrauð og kæfa svo fátt eitt sé talið upp. Allt er þetta auðvitað gert með ráðnum hug til að koma nokkrum kílóum á Siggu en hún hefur styrkst mjög mikið undafarna daga.
Í gærdag fórum við í heimsókn til Afa á spítalann og sú stutta rak upp öskur þegar pabbinn settist með hana á sjúkrarúmið hjá afa, hélt ábyggilega að þarna stæði til að fara í einhverja læknisaðgerð og var ekki tilbúin að taka þátt í því. En við sáum að það lyftist brúnin á Afa við að sjá hana og við förum næst í heimsókn til afa þegar hann er kominn heim aftur.
Annars gengur allt vel og mikið er frábært að geta átt svona góðan tíma með henni þessar fyrstu vikur

fimmtudagur, ágúst 04, 2005

Grillveisla hjá Sunnu Herborg

Myndir
Í dag var hátíðisdagur hjá Kínasystrum þar sem ein þeirra, Sunna Herborg, efndi til veislu þar sem grillað var á tveimur grillum og voru sérvaldir kokkar þar við stjórnvölinn sem sáu til þess að allir fengju magafylli ( þurfti þó nokkuð af mat þar sem þær eru allar með góða matarlyst). Það var gaman að hitta alla aftur og fann maður mikið fyrir þeirri vináttu sem hefur myndast innan hópsins og hve rík við erum að eiga þetta góða fólk að. Eftir þessa miklu veislu þurfti að brenna þeim hitaeiningum sem búið var að hlaða utan á okkur og ákvað því hún Sigga að nú væri nóg komið og tími til kominn að skella sér í sund. Hún Sigga fór að skríkja hástöfum þegar við nálguðumst World Class en þar förum við í laugina - margur er knár þó hann sé smár. Jú rétt var það - við brenndum nokkrum hitaeiningunum í þessari ferð en auðvitað komum við sársvöng til baka og höldum við að núna stöndum við á sléttu eftir daginn þar sem við nærðumst vel áður en sú stutta hélt til náða.
Við njótum þess mikið að vera þrjú saman þessa dagana og það er ótrúlegt að sjá hvað hún Sigga Bára er að komast út úr skelinni meira og meira - mikill prakkari og stuðbolti sem er að fæðast!!!! Takk fyrir hlýjar kveðjur kæru vinir - bless í bú í bili.

miðvikudagur, ágúst 03, 2005

Fréttir af Siggu Báru

Myndir
Þar sem við höfum fengið nokkrar kvartanir yfir því að hafa hætt að segja fréttir af okkur, þeas mest þeirri stuttu, á netinu var ákveðið að setja nokkra nýja punkta um hvernig miðar. Sigga Bára en nátturulega búin að vera alveg frábær finnst okkur og allt hefur gengið ljómandi vel. Hún hefur aukið styrk sinn mikið enda mikið matargat en þó vandlát á hvað henni er boðið uppá þannig er hún t.d. ekki hrifin af "vegalambi" spýtir því útúr sér og vill frekar eitthvað annað en rolluna. Kannski er hún bara matgæðingur og við höfum ekki verið að bjóða henni rétta bragðið.
Við förum með hana í góða göngutúra á hverjum degi og erum að verða búin að ganga um allan bæ og sú stutta situr eins og keisaraynja í kerrunni sinni og baðar út höndum ef sá háttur er á henni en annars situr hún og horfir vel í kringum sig skoðar umhverfið.
Við fórum aftur í sund í dag, núna í laugardalslaugina, og þar var mikið buslað og skemmt sér og ekki mikil hræðsla við vatnið hjá henni.
Hennar hátign féllst loks í dag á beiðni yfirvalda að láta í té þvagsýni en formleg beiðni barst henni fyrir um tveimur vikum síðan og allmargar tilraunir yfirvalda til að ná niðurstöðu í málinu hafa farið út um þúfur. Hún er sem sagt þrátt fyrir allt kona sátta!
Núna bíðum við spennt eftir að hún sleppir sér og kannski standi ein en við teljum að það geti verið stutt í slíka stund hjá henni. Hún hreinlega vill ganga með stuðningi okkar um alla íbúð og foreldrarnir eru orðnir ansi hreint "bognir" í baki og verða að skipta þessu hlutverki á milli sín.
Látum nægja að sinni