Útskrift Siggu Báru Min úr leikskóla

Í dag var útskriftardagur Siggu Báru úr leikskólanum. Dagurinn var stórkostlegur hjá henni en allur hópurinn fór í útskriftarferð á Skagann og nágrenni sem lauk með busli á Langasandi. Svo kl. 18 var hin eiginlega útskrift þar sem allir mættu í sínu fínasta pússi í hátíðarskapi. Börnin gengu svo fram ganginn við undirleik Michael Jackson og sungu og dönsuðu, fleiri söngatriði komu svo í kjölfarið, ræður, pizzu veisla og muffur sem þau bökuðu í gær. Vá hvað við erum búin að vera þakklát fyrir þessa stórkostlegu kennara sem Sigga Bára hefur haft undanfarin ár - það verður seint fullþakkað öll sú hlýja og hvatning sem hún hefur fengið þar svo ekki sé minnst á faglega starfið þar.
Mamman táraðist - viðurkenni það fúslega en þetta er bara stórt skref!!
Litla stóra ljósið okkar er sofnað svo óendanlega glöð.
Bless í bú

Það er lítil stúlka sem bíður

Núna er hægt að greina frá því að fjölskyldan stækkar bráðum. Við skrifuðum undir í dag LOA eða samþykki fyrir að ættleiða yndislega stúlku sem við höfum nefnt Auði Eddu Jin, en kínverska nafnið hennar er Wu Jin Fang. Hún er fædd þann 19.desember árið 2007 og býr í Shanghai.
Við erum núna orðin mikið spennt yfir að fá að hitta hana þó svo að allt ferlið okkar hafi gengið ótrúlega hratt hingað til. Upplýsingarnar bárust okkur á síðasta vetradag þannig að hún er stóra sumargjöfin okkar.
Sigga Bára er ofboðslega spennt og stolt. Getur varla beðið eftir því að fá litlu systir í fangið en aðal málið hjá henni er hvort hún geti ekki örugglega haldið á henni. Auðvitað getur hún það enda að byrja í grunnskóla í haust!
Núna biðjum við til guðs að allt gangi vel í framhaldinu hjá okkur og að við fáum fljótt að hitta litla ungann okkar.
Bless í bú

Fyrsta fótboltaæfingin - Áfram Þróttur

Hún Sigga Bára fór í morgun á sína fyrstu fótboltaæfingu (mamman búin að grátbiðja hana lengi að fara á æfingu) hjá Þrótti. Hún á góða vinkonu sem heitir Elísabet sem skoraði á hana að mæta og viti menn, inn á völlinn gekk Frammari en út af vellinum gekk Þróttari, búin að skora sitt fyrsta mark, búin að taka Þróttarahring með félögunum og öskra saman LIFI ÞRÓTTUR!!
Bless í bú

Vortónleikar yfirstaðnir

Sigga Bára tók þátt í vortónleikum tónlistarskólans í gær og stóð sig eins og sannur fagmaður allan tímann. Hún er búin að vera svo dugleg að æfa sig og foreldrarnir skilja bara ekki hvernig hún getur munað öll þessi lög í fallega kollinum sínum. Amma og afi komu og fylgdust með og svo afhentu þau henni fallega rós að tónleikum loknum - þau kunna að koma fram við prinsessu - enda amma drottning!!
Það er komið mikið vor í hug og hjarta. Pabbi er að fara til Stykkishólms í dag með afa og fleirum að spila golf en við mæðgur munum hitta Matthildi, Karólínu og Kristínu sem verður bara gaman.
Heimilið er búið að vera undirlagt en verið er að mála og snurfusa því ekki gefst tími til þess þegar hugsa þarf um fleiri dömur hér á bæ!!
Bless í bú