miðvikudagur, ágúst 25, 2010

Skólinn stóðst væntingar




Það var  stolt stúlka sem gekk í skólann í dag, með litla systur sér við hlið sem neitaði að fara út nema hafa líka bakpoka meðferðis. Sigga Bára er í hópi sem kallast Hrafnarnir (eins og fuglinn) en þar eru margir góðir vinir. Á sama borðaklasa situr Elísabet vinkona og Huginn þannig að þetta er allt saman mjög þægilegt. Henni fannst gaman að fara í tvær frímínútur en var ekki alveg sátt við að fara ekki í Selið (frístundarheimilið) með hinum krökkunum - en það kemur að því. Auk þess var steikti fiskurinn mjög góður en mín bara gleymdi að fá sér grænmeti, ekki alveg viss um að það sé rétt skýring hjá dömunni en hún fær að njóta vafans svona fyrsta daginn.
Auður Edda leit við í vinnuna hjá mömmu sem var bara gaman enda vandfundið svona skemmtilegt fólk eins og þar er að finna.
Þegar Sigga Bára var búin í skólanum skelltum við mæðgur á okkur hjólahjálmana, hjóluðum í ísbúðina til hennar Lóu þar sem dæturnar sleiktu ís í veðurblíðunni en mamman sötraði vatn. Já þeim er misskipt lífsgæðunum.
Bless í bú

þriðjudagur, ágúst 24, 2010

Skólinn hefst á morgunn...

Skólaganga Siggu Báru í grunnskóla hefst í fyrramálið. Mikið óskaplega er gaman að fá að upplifa eftirvæntinguna og gleðina með Siggu Báru, hún er svo tær, heilög og sönn. Hún er þess fullviss að það verði alltaf gaman í skólanum og allir verði vinir. Hún átti erfitt með að sofna í kvöld, spurði í sífellu hvað það væru margir klukkutímar í að hún ætti að vakna og svarið var sofna fyrst unga dama. Skólafötin liggja tilbúin en hún valdi samsetninguna sjálf því hvað er verra en að mæta í skólann í fötum sem mamma velur og finnast maður púkó - kannast einhver við þá tilfinningu?
Auður Edda er alltaf jafn fjörug og skemmtileg. Vaknar brosandi og sofnar ekki eins brosandi. Orðin hrannast inn hjá henni, skilningurinn flottur, mikil sundkona og bara elskar að vera úti að moka, fékk meira að segja að moka með krökkunum á Hofi í dag þegar Sigga Bára kom í heimsókn til að monta sig með litlu systur.
Lífið er semsagt að komast í "rútínu", Kalli farinn að vinna og mamma er í mömmó!
Bless í bú

sunnudagur, ágúst 22, 2010

Latabæjarhlaupið – engin leti þar




Við fórum fjölskyldan í gær niður í bæ eins og svo margir. Búið var að skrá Siggu Báru í Latabæjarhlaupið og var mikil stemming yfir þátttökunni, síðast þegar hún fór í það var hún þriggja ára og man ekkert eftir því!! Þarna hittum við marga vini og var mikil gleði. Sigga Bára vissi það að það myndu allir vinna í þessu hlaupi og var sú setning endurtekin nokkrum sinnum við ráslínuna þar sem hún stóð auðvitað fremst. Mamma hljóp með henni þessa 1,5 km. á meðan pabbi og Auður Edda voru í hópi hvetjara á hliðarlínunni. Til að gera langa sögu stutta þá við marklínuna bauðst Sigga Bára til að draga mömmu í mark – jebb hún hefur þolið í lagi hún Sigga Bára.

Eftir hreyfinguna var labbað niður á torg, drukkið kaffi í Ráðhúsinu með Olgu, Olla og Eyþóri en þar sem vindur hafði rokið upp og kuldi farinn að hrjá mannskapinn var farið á skyndibitastað borðað mikið óhollt, brunað á videoleigu og svo var horft á Harry Potter með popp í skál. Sigga Bára er nefnilega að byrja á Harry Potter bókunum – pabbi les fyrir mæðgurnar á kvöldin og svo er horft á viðeigandi mynd. Hann kann að dekra við dömurnar sínar hann Kalli!

Bless í bú

mánudagur, ágúst 16, 2010

Hjólað um bæinn.

Við létum það ekki á okkur fá að einhverjir óprúttnir kappar töldu sig geta tekið frá okkur ekki bara eitt reiðhjól heldur tvö slík farartæki. Við festum kaup á einu hjóli og fengum síðan þennan líka flotta stól fyrir litlu dömuna þannig að núna er bara hjólað um bæinn. Heimsóttum Höllu afmælisbarn og Palla í gær í Kópavoginn og létum rigningu ekki á okkur fá heldur bættum bara við einum hlífðarfatnaðinum. Síðan var farið í þennan flotta hjólareiðaleiðangur í dag. Auður vaknaði af einhverjum ástæðum rúmlega fimm í morgun og eftir morgunleikfimi frúinnar þá var smurt og pakkað í bakpoka. Við héldum upp í Elliðaárdal og borðuðum nesti, hjólunum síðan áfram og fórum og skoðuðum Árbæjarsafnið sem er frábært svæði til að fara með börn. Flott safn og skemmtilegt að koma þarna. Sigga Bára er þvílík hetja hjólaði þetta allt og þrjóskaðist við í mestu brekkunum með því að tuða „ ég get þetta, ég get þetta“ ekki hægt annað en horfa til hennar full aðdáunar. Vonandi viðrar vel næstu daga til að halda áfram að skoða bæinn og kannski einhver ný hverfi, hver veit ?
Bless í bú

laugardagur, ágúst 14, 2010

Laugardagur til lukku

Morguninn var tekinn rólega í dag hjá fjölskyldunni eða þar til við litum út um gluggann og sáum þrestina gera árás á rifsberjarunnana!! Kalli og Auður Edda ruku út í rigninguna og týndu rifsber eins og enginn væri morgundagurinn. Svo litu Anna Kristín, Fanney og Hafsteinn við hjá okkur, alltaf gaman að hitta þau. Svo var farið á róló og mikið ótrúlega er gaman að sjá hvað Auður Edda er búin að læra margt og hvað Sigga Bára er alltaf að verða ábyrgari og natnari við systur sína. Palli, Halla og Halla Elísabet hittu okkur á róló. Hemmi, Þóra og börn litu við, Aggi vinur og að lokum Olga og börn. Við erum rík að eiga svona góða fjölskyldu!!
Auður Edda er farin að mynda mörg orð eins og  hími (sími), pissa, mata, gisa (kisa) og svo koma nöfn fjölskyldumeðlima auk þess sem verið er að rugla pínu með augu, nef, munn og eyru. Snillingar sem við eigum hér á bæ.
Bless í bú

miðvikudagur, ágúst 11, 2010

Áfram heldur gleðin


Auður Edda Jin er algjör perla og unnir sér vel hjá okkur. Undanfarnir dagar hafa verið virkilega skemmtilegir og gefandi fyrir okkur með Auði Eddu. Hún er skemmtilegur orkubolti sem er alltaf á fullu og líka dugleg að dunda sér og skoða hlutina ef þannig stendur á. Helst vill hún vera úti og þá helst hlaupandi nú eða í sundi. Búið er að fara í fyrstu heimsókn til Ömmu og Afa þar sem hún tók vel til matarins sem gladdi afa mikið. Hún borðar vel og nýtur þess að smakka og ekki síður að taka þátt í því að búa til mat sem er alveg eins og Sigga Bára hefur líka alltaf gert. Sigga Bára er virkilega góð við litlu systir og skilningsrík og leikur sér við hana og leiðbeinir eins og búast mátti við af henni. Þrátt fyrir að við höfum mest verið heimavið og tekið á móti gestum þar eins og aðstæður leyfa þá leyfðum við okkur að fara og hitta hóp 12 um síðustu helgi , en hópurinn frábæri hittist að þessu sinni í Elífsdal í Kjósinni. Það vantaði ekki gleðina þar og stúlkurnar skemmtu sér virkilega vel og nutu þess besta sem hægt er, góðum félagsskap, fallegu umhverfi og ótrúlega góðum mat (og mikið af honum). Sú stutta var virkilega þreytt eftir daginn og sofnaði í bílnum á leiðinni sem er fyrsta skipti sem það gerist. Við höfum svo verið að gera smá aðlögun á herbergjum hjá okkur til að tryggja að skólastelpan sem er að fara í fyrsta bekk eftir nokkra daga verði tilbúin í nýtt umhverfi, annars verður að segjast eins og er að lífið leikur við okkur og dömurnar eru báðar alveg frábærar og gera gömlu hjónin yngri ef eitthvað er....
Aurður Edda er líka farin að skilja alveg ótrúlega mikið, fara eftir tilmælum, sækja hluti og tala smá þó kínverskan sé auðvitað númer eitt!!
Myndir birtast bráðum kannski í næsta pósti - tæknin aðeins að stríða okkur.
Bless í bú

föstudagur, ágúst 06, 2010

Auðurnar hittust í fyrsta sinn, langur göngutúr og læknar landsins


Dagurinn gekk vel hjá okkur og var einkar ánægjulegur. Hann hófst með góðri heimsókn frá Auði og það kom ekki á óvart að vel fór á með þeim nöfnum. Við tókum okkur síðan til og fengum okkur góðan göngutúr niður í bæ, horfðum til himins og tókum áhættuna á því að ekki myndi rigna mikið á okkur. Eftir góðan göngutúr í bæinn fórum við og fengum okkur Tælenska súpu á Skólavörðustíg, eitthvað sem klikkar ekki. Við tilltum okkur á nærliggjandi gæsluvöll og kláruðum súpuna en urðum að leita vars því við fengum á okkur góða dembu. Við áttum síðan tíma hjá Gesti lækni og félögum sem gekk ágætlega, ekki var sú stutta ánægð með þessa sprautu en hverjum er vel við þær? Eins og staðan er þá er Gestur er virkilegá ánægður með þá stuttu og hlutirnir eru að ganga vel hjá okkur. Við eru aðeins að prófa okkur áfram með svefninn hennar Auðar Eddu og slepptum því að láta hana taka lúr í dag þar sem ílla hafði gengið að koma henni niður í gær. Hún var því orðin nokkuð syfjuð þegar hún hafði hesthúsað góðum disk af stöppuðum fiski og steinsofnaði yfir fréttum enda ekkert tilefni til að vaka yfir þeim, frekar tíðindalítið og ómerkilegt. Þá tók við kósý kvöld með Siggu Báru þar sem hún fékk að ráða kvöldinu. Hún stendur sig sem hetja og er mikið að sinna litlu systur, er góð og blíð við hana og leikur við hana alltaf meira og meira. Er hægt að biðja um eitthvað betra ?
Bless í bú

miðvikudagur, ágúst 04, 2010

Sund og sæla

Undanfarnir dagar hafa gengið vel hjá fjölskyldunni. Hún Sigga Bára er svo ljúf og góð við systur sína og við sjáum mikinn dagamun á þeim hvað þær sækjast meira í félagsskap hvor við aðra. Við erum búin að fara í sund með góðum vinum bæði í gær og í dag. En óvænt hittum við Ingvar Wu ásamt fjölskyldu í Laugardalslaug í dag sem var gaman og svo hittum við líka Önnu Kristínu og fjölskyldu í sömu sundferð - ekki amalegt að hitta ferðafélaga úr báðum Kínaferðum á sama degi!!
Auður Edda er fyndin lítil stúlka sem hermir eftir öllu - er sérstaklega hrifin af símanum og talar við alla "Allo bæ bæ" hlær og vill endurtaka leikinn. Sigga Bára er líka aðalkennarinn en það er sama hvað hún gerir þá vill Auður Edda herma eftir. Í kvöld gerði hún samt eitt sem okkur Siggu Báru fannst pínu fyndið (Auður Edda heyrði ekki flissið í mömmu og stóru systir) en þegar mamma var að lesa kvöldsögu fyrir dæturnar uppi í rúmi tók Auður Edda lúmskt í hönd systur sinnar, bara hana að enninu og þóttist hafa meitt sig - eða kannski að Sigga Bára hafi verið að meiða hana - þarna var daman að sækjast eftir vorkun og knúsi sem er gott en auðvitað ekki á kostnað stóru systur. Mikið var Siggu Báru samt létt að mamma var vitni að þessum atburði hjá litlu systur sem hún endurtók nokkrum sinnum.
Við erum ríkir foreldrar!!
Bless í bú
Myndir hér

mánudagur, ágúst 02, 2010

Systurnar fóru út á róló

Sigga Bára og Auður Edda fóru tvisvar sinnum út á róló í dag. Litla systir elskar að renna sér - kemur ekki á óvart þar sem hún mun örugglega fara í eitthvað jaðarsportið segja foreldrarnir, svo er verið að kenna henni að róla, vegasalt og moka. Hún Sigga Bára er dugleg að kenna þeirri stuttu og hermir Auður Edda allt eftir henni. Í dag komu móðursystur með börnin sín (og Gunna ) og þótti systrum það gaman. Amma og afi litu við en amma var búin að prjóna fallega peysu á Auði Eddu en í gær komu Palli, Halla og Steinunn Vala í heimsókn og færðu henni Auði Eddu fallegt eyrnaband ala Halla. Sú á eftir að verða fín í vetur!!
Ferðafélagarnir Brói og Edda komu í morgun - það er ekki laust við að við séum í fráhvarfi þar sem allir dagar ferðarinnar voru svo skemmtilegir með þeim!!
Systurnar eru sofnaðar núna - glaðar eftir útiveruna í dag og stefnt er á að vera mikið úti á morgun líka!!
Bless í bú
Myndir eru hér

sunnudagur, ágúst 01, 2010

Laugardalurinn er staðurinn

Deginum í gær og í dag var að mestu varið utanhúss. Í gær var farið í sund (aftur!) og svo grasagarðurinn þar sem sú stutta tiplaði á tánum í grasinu á meðan stóra systir og Elísabet vinkona hennar stóðu fyrir leikhússýningu á styttunum. Í dag kom Blómvangsfjölskyldan í heimsókn og eftir gott morgunkaffi var farið í Húsdýragarðinn þar sem Matthildur og Sigga Bára nutu sín ekki síður en Karólína og Auður Edda.
Svo var haldið heim, Sigga Bára og Matthildur léku sér það sem eftir var degi á meðan Auður Edda tók sér lúr og tók á móti þeim Palla, Höllu og Steinunni Völu.
Auður Edda er ótrúlega lífsglöð stúlka, hún veit hvað hún vill, er feimin við ókunnuga en þar sem hún er öruggust já þá á Duracell viðurnefnið vel við!! Sigga Bára stóra ljósið okkar er svo þolinmóð og góð við nýjan fjölskyldumeðlim - hefur eiginlega stækkað mikið á þessum tveimur vikum - kannski of mikið finnst mömmu.
Jæja hér er meira af þvotti en var áður og okkur ekki til setunnar boðið ....
Bless í bú
Myndir eru hér

föstudagur, júlí 30, 2010

Búið að hitta Gest lækni, fara í sund og hoppa á trampólíni


Í gær fengum við móðursysturnar í heimsókn og mikið var það gaman. Eftir hádegi fór Auður Edda til Gests barnalæknis sem er náttúrulega snillingur, hennar hátign fór með foreldrum sínum og privatdoktornum honum Bróa þannig að hún var vel mönnuð á Lansanum. Gestur sagði það sem við foreldrarnir höfum sagt allan tímann "Þetta er flottur krakki" og þurfum við ekki að hafa fleiri orð um það.
Í morgun vöknuðu þær systur kl. 5 þannig að þegar klukkan var 9 var dagurinn hálfnaður, Íris frænka hafði litið inn  og svo var arkað í laugina. Hún er hafmeyja eins og stóra systir - það er ljóst að sundlaugin verður mikið notuð næstu misserin. Sigga Bára var í gær mikið með Telmu frænku og í dag kom Elísabet, sem líka var að verða stóra systir, og léku þær sér saman fram á kvöldmat.
Brói og Edda litu við, Erna Hrund og Alli einnig. Mikið er lífið dásamlegt!!
Bless í bú
Hér eru myndir.

miðvikudagur, júlí 28, 2010

Komin heim á Hofteig.

 Já þá er þessu magnaða ferðalagi okkar lokið þvílík ferð hún gekk svo vel í alla staði að það er hreinlega ótrúlegt. Ekki hægt að hugsa sér betra tilefni til að leggja land undir rfót en að eignast barn og að allt annað skyldi síðan ganga svona vel. Ferðafélagarnir voru nátturulega þeir besti í heimi og síðan allt þetta góða fólk sem við vorum með í ferðalaginu og þá auðvitað standa Jói og Jóna uppúr og þáttur þeirra verður seint fullþakkað fyrir, algjörlegar ólýsalegt hversu gott og gaman það var að vera með þeim á þessum nýja heimavelli í hinni mögnuðu borg Peking. Ferðalagið sjálft gekk vonum framar eftir að við komumst um borð en það voru ýmis innritunarvandamál sem þurfti að leysa þótt það hafi ekki verið beint hjá okkur en við höfum ætlað okkur að eiga nægan tími í flugstöðinni og skála í síðasta sinn í bili í Peking, en það tókst ekki heldur fórum nánast á handahlaupum um borð. Auður Edda var frábær í fluginu stillt og góð, svaf smá en var annars sem hugur manns. Að vísu urðum við fyrir því í fysta sinn að kvartað var undan okkur en par sem sat sæti fyrir framan okkur kvataði því eftir að kellan hafði sofið amk í 5 tíma óáreitt þá tók Auður Edda upp á því að fara að lita og gerði það með þeim hætti að smá heyrðist meira í pennanum sem notaður var en alla jafnan heyrist. Mjög þarfur fegrunarsvefn kellu styttist sem þessu nam og flugfreyja kom til að tala við okkur. Eftir að þær áttuðu sig á staðreyndum þá sendu þær parinu illt auga og við gerðum lítið í því að draga úr athafnaþörfinni. Lífið sjálft sér um að skapa svona fólki rétt umhverfi. Við getum hiklaust mælt með þessari ferðaleið með Finnair í gegnum Helsinki því það var síðan rúmur klukkutimi þar í litilli en góðri flugstöð og ekki sama stress og þegar farið er í gegnum margmennið í Kaupmannahöfn, auk þess sem ferðarlagið tekur skemmri tíma. Siðasti leggurinn er nátturulega alltaf magnaður að byrja að sjá Island birtast undan skýjum og síðan að komast á áfangastað heilu og höldnu. Móttökunefnd kom á völlinn og ekki var viðgjörningurinn verri þegar komið var heim. Amma hafði bakað margar kökur og komið með fullt af mat fyrir okkur, færði okkur öllum rósir og svo fékk Auður Edda það sem allar ömmustelpurnar fá gull hjarta men! Takk amma og afi fyrir allt. Við fórum síðan snemma í háttin enda dauðþreytt eftir tæpan sólarhring og síðan vöknuðum við eldsnemma til að taka á móti nýjum degi. Sigga og pabbi vöknuðu háf fjögur, mamma fjögur og Auður Edda kl. 5!!!


Takk allir fyrir hlýjar, fallegar og uppbyggilegar kveðjur til okkar meðan á ferðinni stóð.

Myndirnar sýna svo ferðina í dýragarðinn, síðasta kvöldið hjá Jóa og Jónu (seint hægt að fullþakka þeim hjónum!!) og flugferðin. Það er ein mynd af Siggu Báru í fangi eins kínversks manns en það er einmitt bílstjórinn sem keyrði okkur í Peking þegar við sóttum Siggu Báru árið 2005- við eigum aðra mynd af þeim frá þeim tíma – svona er Kína lítið!!!

Bless í bú

þriðjudagur, júlí 27, 2010

Kveðjum Peking

Síðasti dagurinn í Peking í bili.Það er farið að styttast verulega veru okkar hérna í Peking í bili núna er verið að leggja lokahönd á pökkun á öllu og mikil spenna í gangi hjá öllum.Dagurinn var frábær í alla staði, við fórum með dömurnar með hópinum í dýragarðinn sem er frábær a.m.k fyrir okkar dömur sem nutu þess í botn. Það var samt full stuttur tími og reyndar sáu við ekki mikið meira en óæðri enda af Pöndunum en við ættum að geta gert okkur í hugarlund hvernig þær líta út í raun. Brói og Edda fóru í golf með Jóa og Jónu og þótti það frábært í alla staði þótt hitinn hafi verið góð afsökun fyrir því að skorið sé ekki gefið upp opinberlega. Við viljum þakka öllum fyrir góða strauma og skemmtilegar athugasemdir og allan þann hlýhug sem okkur hefur verið sýnd meðan við höfum verið hérna í Peking. Svo sjáumst við og heyrumst þegar við erum komin á leiðarenda heim sem verður fljótlega. Engar myndir verða settar inn í dag – hér er setið og spjallað. Kærar þakkir Jói og Jóna fyrir okkur.


Bless í bú

mánudagur, júlí 26, 2010

Schengen áritun í höfn og vika síðan við fengum Auði Eddu Jin í fangið

Dagarnir eru taldir niður núna en mikið óskaplega er þetta samt gaman og þvílík forréttindi að fá að vera í felagskap með öllu þessu góða fólki.Við tókum daginn snemma og fórum í góðan göngutúr með dömurnar tvær og þá báðar í kerrum. Auður Edda var nú ekki alveg á því enda höfðum við ekki tekið þann slag við hana að vera í kerru, þvílíkur grátur en hann stóð stutt því það var hægt að lauma að henni smá mat og þá gleymdist a.m.k af og til hversu ósanngjarnt það væri að vera í kerru. Eftir daginn þá var hún bara nokkuð glöð með kerruna og þær systur sofnuðu báðar í kerrunum sínum og sváfu vært. Síðdegis var síðan þetta flotta boð hjá Kristínu sendiherra þar sem börnin fengu afhendar vegabréfsáritanir til að geta komið til Islands, ekki amalegt fyrir Auði Eddu að hafa allan tímann búið hjá Jóa í Peking, manninum sem gefur út áritanirnar fyrir Íslands hönd.Virkilega flott hjá þeim í sendiráðinu og skemmtilega stund og í alla staði til fyrirmyndar.Innan sendiráðsins eru þetta víst miklir tilhlökkunar dagar því það er svo mikil gleði yfir öllu.Sigga Bára og Guðmundur „ besti vinur“ lék sér saman og fengu marga gesti til að vera í feluleik við sig og þá var bústaður sendiherra undirlagður fyrir þau í þeim tilgangi. Auður Edda hins vegar var í sínu besta formi og það liggur fyrir að það er óþarfi fyrir hjónin að eiga eitthvað world class kort það er nóg að ætla að sér að elta dömuna sem fór amk 300 ferðir milli hæða og taldi tröppurnar ýmist á kínversku eða var að apa eftir íslensku tölunum. Hún var bara hlaðin orku og stoppar ekki sú stutta, alltaf á fullu og brosir út í eitt og svo eltum við og gefum henni fæðu til að hún geti nú örugglega haldið áfram. Hún fór algjörlega á kostum en var líka rosalega þreytt þegar heim var komið. Núna erum við byrjuð að pakka og gera klárt því á morgun er síðasti dagur, við förum í dýragarðinn og síðan í smá hádegisverð síðan er það loka pökkun.Brói og Edda ætla að fara í golf með Jóa og Jónu, ekki slor að hafa það á ferilskránni að hafa spilað golf í Kína. Það er ekki hægt að þakka þeim hjónum nægjanlega fyrir frábæran félagsskap,óendanlega þolinmæði og gleði.


Í dag á Olli afi afmæli sem hefði orðið 77 ára og langamma Bína hefði orðið 100 ára í dag. Hugur okkar eru hjá þeim ástvinum okkar sem hafa kvatt þennan heim.

Bless í bú

sunnudagur, júlí 25, 2010

Gosbrunnar og gleði

Það er farið að styttast í brottför og töskurnar bíða hálfopnar og næstum hálftómar, trúir þessu einhver ? En grínlaust þá höfum við ekki nennt að taka upp úr töskunum eftir komuna frá Shanghæ enda finnst okkur svo stutt í næstu brottför. Í dag var dagurinn tekinn snemma og við fórum alveg svakalega skemmtilega verslunarmiðstöð þar sem búið er að útbúa gosbrunnasvæði sem krakkar elska.Eitthvað sem svo sannarlega væri gaman að sjá heima á Íslandi. Hrund og Skarpi voru með okkur og það voru fagnaðarfundir þegar Sigga Bára og Guðmundur Góði þeirra hittust aftur.Þau fóru beint að leika sér og voru á fullu í dag í vatninu og það var ekki þurr þráður á þeim eftir daginn. Ingvar nýji fjölskyldumeðlimur þeirra hjóna var frumsýndur og fegurðin er þvílík að ekki eru til orð til að lýsa. Auður Edda var fyrst smá stessuð yfir vatnssullinu en eftir smá stund var hún farin að hlæja og tók næstum bakföll af hlátri. Myndirnar segja vonandi sýna sögu. Þarna hittum við eitthvað af Íslendingum meðal annars sendiherrann hana Kristínu sem var glöð og kát sem fyrr en við erum boðin í veislu til hennar á morgun. Síðan fórum Brói og Kalli með dömunrnar í hús meðan hinar konurnar fóru að kanna með verslunarframboðið. Auður lék við hvurn sinn fingur áfram og glöddu okkur gömlu mennina ótrúlega mikið. Hún fór amk 300 ferðir milli okkar herbergis og stofunar með dótið sitt fram og til baka og var að dunda sér endalaust, hún er alveg yndisleg þessi stúlka það er svo gaman af henni og það er svo gaman að sjá púkaglottið sem kemur fram hjá henni þegar verið er að banna henni og setja henni mörk. Hún má þó eiga það að hún virðir þegar henni er bannað. Kvöldið fór síðan í að sjá alveg hreint út sagt frábæra fjölleikasýningu sem er ólýsanlegt upplifa. Þvílíkt listafólk sem þarna er á ferðinni alveg hreint út sagt frábær skemmtun og Sigga Bára og Guðmundur Góði nutu þess í botn. Mamman og Auður Edda áttu notalega stund saman á meðan.


Bless í bú

laugardagur, júlí 24, 2010

Komin til Peking- mikið gott

Þá er fyrsti hluti ferðalagsins heim að baki og við komin til Peking, þvílíkur unaður og Sigga Bára ljómaði þegar hún sú Jóa og Jónu bíða eftir okkur. Það var skýtin tilfinning að fara með Auði Eddu burtu úr borginni sinni a.m.k tímabundið. Ferðalagið tókst vel það var smá seinkun hjá okkur en flugið sjálft gott, systurnar stóðu sig vel og Auður Edda var eins og hetja í sínu fyrsta flugi, það er eins og börn átti sig á því að við sumar aðstæður þá er ekki ráðrúm til þess að ganga mikið um og sprella eins og venjulega. Hún borðaði vel, nema hvað, og sofnaði síðan og svaf meiri hluta flugsins og sama má segja um Siggu Báru en eins og margir vita þá virðist hún eiga voðalega auðvelt að sofna einkum í farartækjum og nægir yfirleitt að ræsa bílvél til að augnlok hennar þyngist verulega og ekki verði aftur snúið. Við skelltum þeim systrum í sturtu og núna er kósy tími eins og Sigga kallar það og litli unginn virðist sáttur við það. Við erum að skoða hvað við gerum á morgun og stefnt er að því að leyfa Siggu að fara í tivoli og sjá gosbrunna sem má hoppa út í og vonandi verður hitinn viðráðanlegur fyrir okkur eldri. Þvílík forréttindi að fá að gista hjá Jóa og Jónu okkur líður strax eins og við séum komin heim svo ólíkt því að vera á hóteli þótt ekki hafi verið hægt að kvarta undan aðbúnaði þar þá er það bara svolítið annað. Þau hjónin sóttu okkur á flugvöllin og þegar við komum heim beið eftir dömunum demantar Kína eða Jade hálsmen fyrir þær báðar. Þetta eru fegurstu hálsmen sem eiga að boða þeim gæfu og hafa þau hjón núna gefið systrunum minningu frá Kína sem mun vernda þær um aldur og ævi.


Við tókum reyndar eftir því í vikunni að við sáum kunnuglega undirskift á fallegu verki í anddyri hótelsins og reyndist það vera undirritun frá Vigdísi forseta en hún hefur gist á þessum hóteli þegar hún fór til Kína og þarna virðist Davíð og frú hafa gist líka.

Jæja núna er er klukkan orðin rúmlega 22 og dömurnar sofnaðar. Jói, Jóna, Brói og Edda eru úti en hér heima sofa dýrmætu dömurnar okkar værum svefni. Á morgun fáum við vonandi að hitta Ingvar,Guðmund og foreldra – mikill spenningur að fá að hitta þau öll fjögur.

Bless í bú

fimmtudagur, júlí 22, 2010

Síðasta kvöldið í borginni hennar Auðar Eddu Jin

Fórum í frábæra kvöldgöngu í gærkvöldi eftir að hafa fengið okkur heldur fábreyttan kvöldverð en forðinn var ennþá til staðar eftir hádegisverðin góða.Við gengum út í ennþá einn garðinn sem heitir Taipingqiao Park og er í um 30 mín göngu frá hótelinu en þá er gengið í gengum flott verslunarhverfi og við fengum okkur einn hressandi og svalandi Starbucks kaffidrykk. Sú stutta var í svonefndum sixpack poka sem situr framan á magavöðvum og þar leið dömunni vel þótt nokkuð hafi verið grátíð í upphafi þar sem hún hafði ætlað sér að hvíla framan á mútter. Hún lék á alls oddi og söng fyrir okkur kínversk lög sem er hrikalega fallegt að heyra og vonandi tekst okkur að viðhalda því hjá henni. Þessi garður sem er dæmigerður fyrir fjölmarga sambærilega eru fullur af fólki á kvöldin sem sitja við tjarnir og ræða málin, karlar gjarnan háværari (ólíkt með löndunum) og spila en konurnar eru öllu nettari í sínu spjalli.Þarna eru börn að leik þótt áliðið sé en í raun er það skynsamlegt því tæplega er hægt vera úti yfir miðjan daginn. Ólýsanlegt var síðan þegar við byrjuðum að heyra fjölbreyttan söng yfir tjörnina sem við sátum við og þegar við lukum göngutúrnum komumst við að því að þar sat einn eldri maður á vélhjólastól með þvílíkan karokee útbúnað að veitingastaðir væru stoltir af. Hópur hafði safnast saman hjá kallinum og tóku lagið þannig sannast að það er ekki bara fyrrverandi forseti þeirra Kínverja sem elskar að syngja fyrir fólk heldur eru það fleiri landsmenn sem það elska svo sannarlega. Hitinn var æðislegur í kvöld ábyggilega rétt um 25 stig eða svo, sem er mikill munur miðað við rétt um 40 stig að degi til. Síðan var gengið heim og þá þarf að passa sig í umferðinni því gangandi vegfarendur eru ekki réttháir hérna. Þó er umferðinni hérna í Shanghæ nokkuð betri en í Peking þar sem hún er nú eiginlega hrikaleg það verður bara að viðurkennast.


Við tókum daginn snemma eftir að systurnar höfðu báðar vaknað með bros á vör. Við fengum okkur göngutúr út í nærliggjandi garð í þeim tilgangi að geta fylgst með morgunleikfimi. Líklega vorum við aðeins of sein á ferðinni því það voru ekki margir í slíkum æfingum að þessu sinni, kannski náum við að upplifa það í Peking um helgina. Við vorum síðan sótt af Línu leiðsögumanni og við fórum til að skoða Buddha hof sem var alveg frábært að upplifa, þvílík fegurð ró og friður, eiginlega alveg magnað hvað fylgir mikil innri ró. Það voru margir innfæddir við trúariðkun og virtust ekki kippa sér mikið upp við fjölda ferðamanna sem fór um með leiftrandi myndavélaglampa í sífellu. Munir þeirra eru virkilega fallegir og allt útskorið og síðan miklar gillingar á öllu. Eftir góða stund létum við listamann á svæðinu skrifa upp nafnið á Auði Eddu á kínversku þeas kínverska nafnið hennar og fallegan boðskap til hennar frá okkur. Smá af minjagripum voru keyptir en leiðin lá síðan að silkiverksmiðju sem er ríkisrekin og þar fengum við sögu þess hvernig silki er unnið úr silkiormum eða púpunni þeirra öllu heldur. Virkilega fræðandi og skemmtilegt að fá að sjá. Eitthvað smotterí datt í innkaupakörfur okkar og sama var á næsta stoppustöð sem var Ríkisrekna perluverksmiðjan þar sem við keyptum sambærilega hluti fyrir Auði Eddu og við höfðum keypt á sínum tíma fyrir Siggu Báru. Á leiðinni hótelið var stutt stopp hjá sýslumanni þar sem við fengum afhent síðustu eintökin af pappírum frá Kína vegna ættleiðingarinnar og núna er því Auður Edda Jin formlega orðin hluti af okkar fjölskyldu og sómir sér vel. Húrra. Hún hefur verið alvega frábær í dag, var í burðarpokanum hjá Pabba sínum og kvartaði ekki neitt heldur hló og skríkti og naut lífsins meðan sérstaklega þegar sá gamli læddi að henni einum og einum kexbita. Núna er að líða síðasti dagurinn og við erum farin að huga að því að pakka saman okkar hlutum, við kvöddum leiðsögumanninn en einhver annar mun fylgja okkur út á völl á morgun. Ekki er víst að neitt komi frá okkur á morgun því það er ferðadagurinn mikli og fróðlegt verður að vita hvernig sú stutta tekur fluginu. Við erum ekki alveg að sjá þess feimnu stúlku sem talað er um í pappírunum heldur er hún fjörug og stríðin hverjum sem það líkist nú. Að lokum til hamingju með afmælið Olgeir Þór hlökkum til að hitta þig í næstu viku!!
Bless í bú

Ekki lát á frábærum dögum og hita í Shanghæ

Dagurinn byrjaði vel hjá okkur, dömurnar sváfu vel í nótt og vöknuðu með bros á vör sem fyrr. Eftir góðan morgunverð þá fórum við í ferð með leiðsögumanni okkar henni Línu eins og hún heitir. Við fórum í það sem kallað er hér gamli hluti borgarinnar og hefur staðið hér í einhver hundruð ára. Þetta er „ekta Kína“ eins og sagt er byggingar með þessu flotta kínverska lagi með flottum og útskornum dýrum. Við fórum í Yuyuan Gardens sem er miðpunkturinn þar og er í raun listigarður af fegurstu gerð og er alveg nauðsynlegt að sjá fannst okkur. Falleg hús og tjarnir og listilega vel útfærðir garðar. Hitinn var reyndar óbærilegur og við drukkum mikið af vatni, urðum líka að bera dömurnar báðar því ekki var hægt að vera með kerru bæði vegna mannfjölda og eins vegna þess hversu grófar gangstéttirnar eru en þær eru stundum sjálfar hreint listaverk. Eftir góða stund í þessum garði var okkur boðið í miðdegisverð sem endaði í einhverjum 10 réttum sem hver toppaði hinn fyrri. Alveg frábært og að því loknu smá meiri skoðun. Síðan tók við tea hús þar sem við keyptum smá af tei og smökkuðum hin ýmsu afbrigði sem eiga að virka bæði til að auka meltingu (förum ekki nánar út í það) minnka uppþembu, blóðsykur,karlmennsku og langlífi svo fátt eitt sé talið á löngum lista. Við munum af tilliti til fjölskyldunar ekki greina frá því hvaða te við keyptum að þessu sinni. Litla daman er alltaf flottari og flottari og er orðin virkilega háð mömmu sinni og vill lítið koma til pabbans nema hann hafi Kex eða eitthvað matarkyns svo.það þarf að aðlagast því. Þvílíkt matargat hún er bara óstöðvandi. Núna eru dömurnar allar og Brói í sundi spa og sauna sem líklega er álíka heit og að standa úti á bílastæði en það dugar nú ekki. Sú stutta er sofandi og síðdegið er ófrágangið. Lína leiðsögumaður hló mikið af því á hvaða veitingastað við fórum í gær, sagði að það gæti ekki orðið meira staðbundið en þetta og sagði að foreldrar hennar sem væru gamlir eða eitthvað um fimmtugt (ok náðum því) færu stundum þarna þegar þau gerðu sér dagamun og maturinn væri ok. Henni fannst virkilega fyndið að heyra lýsingu okkar á þessu öllu saman og var stolt af því að við skyldum finna þennan stað því kínverskara verður það nú varla við erum búin að hlæja svo mikið að þessu hjá okkur að það er ólýsanlegt. Núna er bara einn heill dagur eftir í borginni og snemmaá laugardag þá förum við aftur yfir til Peking og okkur hlakkar mikið til að hitta Jóa og Jónu og síðan íslenska hópinn. Aftur og enn þá hafa Brói og Edda létt okkur lífið ótrúlega í þessari ferð – vitum ekki hvernig þetta hafi farið án þeirra!!!
Til hamingju með daginn Geiri


Bless í bú

miðvikudagur, júlí 21, 2010

Sú stutta heldur áfram að koma á óvart.

Það eru búnir að vera hreint út sagt frábærir dagar með Auði Eddu. Hún heldur áfram að koma okkur á óvart, er mjög skörp á því að fylgjast með og herma eftir, tók til dæmis fjarstýringuna af sjónvarpinu og beindi henni að réttu horni sjónvarpsins eins og stóra systir hafði verið að gera. Síðan tók hún fötin sín og braut þau bara nokkuð vel saman og vildi setja þau í skúffuna þar sem fötin eru geymd en toppurinn var samt þegar hún hafði haldið rusli í annarri hendi um nokkurt skeið og fór síðan með í ruslafötuna. Hreint út frábær dama sem vill hafa allt á sínum stað. Það má ekki gleyma því hversu frábært það er búið að vera að hafa Bróa og Eddu með okkur i þessari ferð.Þau eru ekki bara skemmtilegir ferðafélagar heldur einstakir vinir enda hefur ferðalagið verið svo skemmtilega að það er ólýsanlegt í alla staði en núna eru við samt nokkuð mikið farin að hugsa að komast heim í „okkar „ umhverfi en það eru bara 6 dagar því við komum þann 28 heim þá er ferðadagurinn langi sem hefst að morgni hér í Kína og líkur síðdegis þann sama dag á íslensku tímabelti ca 14 tímum síðar eða svo.


Systurnar sváfu vel í nótt og við urðum að vekja þær um hálf átta til að fara í morgunmat. Auður Edda vaknaði með bros á vör og Sigga Bára líka auðvitað. Við tókum okkur góðan tíma en fórum síðan með leigubíl að The Bund sem er strandlengja meðfram ánni Huangpu sem skiptir borginni í helstu hverfi. Hún er stór og mikil og upp hana sigla skemmtiferðaskip sem dæmi. Sagt er að sjái maður ekki þetta svæði meðan á dvöl í borginni stendur sé það svipað og að sjá ekki Forboðnu borgina eða Múrinn þegar dvalið er í Peking. Við tökum undir þetta, því strandlengjan er ótrúlega flott þar sem útsýnið er stórfenglegt með skýjakljúfum og minnismerkjum í allar áttir. Það er líka merkilega saga þarna að baki því þetta svæði er hluti af sögusviði hins svokallaða Opíum stríðs sem ríkti milli Evrópumanna og Kínverja síðari hluta 18 aldar ef við munum rétt. Verjum ekki tíma okkar að greina frekar frá því en kannski er það í takt við stöðu heimsins í dag að hús sem Bretar hertóku og notuðu sem bækistöð sína í þeim aðgerðum hýsir nú höfuðstöðvar Bank of China en Bretar eru á bak og burt sem fátækt lénsveldi sem fellur þeim vel. The Bund er í raun stórt göngusvæði sem í dag var yfirfullt af fólki sem notaði regnhlífar til að skýla sér frá þessu ca 40 stiga hita og sól og raka ekki má gleyma því. Við gáfumst upp eftir klukkustund, búin að drekka allt vatn sem tekið var með og orðin nær gegnsæ af svita svo það lak niður enni okkar. Þegar heim var komið í Kalda Húsið þá náðum við að láta Auði Eddu taka stuttan lúr. Í kvöld var svo farið á ríkisrekinn veitingastað sem mælt hafði verið með í ferðamannahandbók. Það var ólýsanleg upplifun, einkum að vita að Maó hafi líklega sjálfur valið matseðilinn – sérstaklega andarvængir og fætur sem við óvart pöntuðum en Gyða var við það að fara að naga eitt bein þegar það kom í ljós að þetta voru þessi fallegu fit sem breiddust út eins og blævængur sem Siggu Báru fannst voða töff að skoða nánar – þarna var Attenborough live!!

Síðan var gengin sama leið og fyrr í dag nema núna í kvöldblænum ásamt hundruðum þúsunda íbúa og ljósadýrðin milljónir Osrampera!!

Bless í bú

þriðjudagur, júlí 20, 2010

Fyrstu orðin á íslensku komin og það var KEX.

Það tók ekki langan tíma að kenna henni Auði Eddu fyrstu orðin sín á íslensku. Hún er mikill matáhugamaður og því kemur það okkur ekki á óvart að það varð Kex sem hún nefndi fyrst og síðan endurtók í sífellu þegar henni var gefið uppáhaldskexið sitt. En þegar leið á daginn þá fylgdu fleiri orð á eftir, þar á meðal Sigga Báa og Auður Edda og svo er hún farin að herma eftir á fullu og þá einkum því sem stóra systir gerir. Hún er rosalega dugleg og heldur endalaust áfram og passar vel upp á sitt.Fyrsta baðið var frekar stutt því var ekki vel tekið og var því frekar styttra en tilefni stóð til. Annars var það þannig að dagurinn í dag fór í ýmsa vinnu sem tengist frágangi á ættleiðingunni við héldum áfram að undirrita hina ýmsu pappíra í tugum eintaka og síðan fengum við vegabréfið hennar og slatta af myndum til að nota þegar kemur að því að fá áritun fyrir hana heim. Smá mistök urðu í frágangi á endanlega pappírnum um ættleiðinguna þar sem smá stafsetningarvilla hafði lætt sér inn í kerfið svo við fáum það gagn ekki fyrr en síðar í vikunni.Samt er formlega búið að óska okkur til hamingju með allt. Sigríður Bára stendur sig sem hetja og fékk að taka Bróa og Pabba í sund og nutum við þess að synda og þræða hina ymsu potta og gufur sem eru á svæðinu. Síðan var farið út að borða sem fyrr og eins og alltaf þá urðum við ekki fyrir vonbrigðum þar, það er frábær matur hérna er menn á annað borð eru hrifnir af asíumat. Þessi borg er svo hreinleg og þrifaleg og ekki síður en í Peking þá liður manni vel og öryggistilfinningin er bara jafnvel meiri en í Teigunum. Morgundagurinn verður rólegur, reynum að sofa út ef það tekst, það var frekar stuttur svefn í gær, sú stutta vaknaði nokkuð oft og hafði skilað kröftulega frá þér góðum málsverði þannig að ráðast varð i smá aðgerðir af þeim sökum, það hefur síðan heldur lagast þegar leið á daginn. Eftir kvöldverðin gengum við heim á leið og Sigga Bára spurði um það hvort við værum ekki að koma í kalda húsið. En þar er vísað til þess að loftkælingin á hótelinu er með þeim kröftugri. Auður Edda og Sigga Bára liggja núna báðar sofandi í rúminu hlið við hlið og mikið er það falleg sjón. Þessar dömur eru fjársjóðurinn okkar.


Bless í bú