föstudagur, júní 24, 2011

Sigga Bára Min 7 ára í dag!

Þá er dagur að kvöldi kominn. Sigga Bára Min varð 7 ára í dag. Eins og alla aðra afmælisdaga gladdi sólin okkur og dreifði geislum sínum yfir afmælisbarnið, fjölskyldu og vini enda sólin að hitta sólina ekki satt! Hún vaknaði klukkan 4 í nótt tilbúin í daginn og varð frekar fúl yfir því að vera sagt að sofa lengur en hún hlýddi og vaknaði ekki fyrr en foreldrarnir og litla systir vöktu hana með söng. Búið var að setja sjö afmæliskerti hringinn í kringum karamellu kleinuhring og svo blés hún á þau öll uppi í rúmi, tók upp pakkann frá nöfnu sinni henni Báru og sveif fram í eldhús. Þar var pabbi búinn að gera uppáhalds morgunmatinn, beikon og amerískar pönnukökur. Svo kom amma í heimsókn beint úr bakaríinu og veislan hélt áfram. Hápunktur dagsins var þegar fjölskyldan og vinir komu í veisluna sjálfa, sunginn var tvisvar sinnum afmælissöngurinn þar sem Siggi Valur varð að syngja sönginn með loftgítar tilþrifum - hann klikkar ekki sá töffari.
Núna er litla ljós sofnað eftir góðan dag, stóra ljós vakir og horfir á dýralífsþátt með sínum besta vini honum pabba.
Takk kæru vinir og fjölskylda fyrir daginn.
Takk kæra dóttir fyrir gleðina sem skein út frá þér allri á deginum þínum.
Bless í bú

fimmtudagur, júní 02, 2011

Það eru 6 ár síðan við fengum upplýsingarnar um Siggu Báru Min

Tíminn líður hratt - það eru liðin 6 ár frá því við foreldrarnir fengum símtalið þar sem okkur var tilkynnt að í Jiangxi héraði í Kína biði litla Fu Ling Min eftir að komast í okkar fang. Það er ljúft að hugsa til baka og tilfiningarnar streyma um mann allan, þessar tilfingingar eru dásemd ein.
Lífið hefur verið okkur gott og gjöfult frá þeim degi og erum við þakklát fyrir það. Dagurinn í dag var fallegur og góður. Við fórum dömurnar með ömmu á Selfoss þar sem Sigga Bára tók þátt í fiðlunámskeiði sem endaði í Eden í Hverargerði þar sem hópurinn hélt tónleika. Brói og Edda hittu okkur þar og svo var slegin upp heljarinnar ís veisla og að lokum farið og keyptar plöntur í matjurtargarðinn og Sigga Bára fékk þrjár jarðaberjaplöntur sem hún hefur óskað sér frá því vorið leit dagsins ljós hér í garðinum.
Takk Sigga Bára Min fyrir þig - þú ert frábær!!
Bless í bú

sunnudagur, maí 29, 2011

Hvammur í Landssveit er staðurinn











Það hefur verið árviss viðburður að heimsækja flottustu bændur landsins að Hvammi í Landssveit og sjá vorboða fæðast, anda að sér góðu lofti og borða bestu kökurnar! Kollý og Ævar voru tilbúin að taka á móti okkur fjölskyldunni í dag en þetta er í fyrsta sinn sem Auður Edda fer með okkur á bóndabæ. Við foreldrarnir héldum að Sigga Bára væri efnilegasti bóndinn en hún Auður Edda er jafnoki hennar á því sviði. Hún hljóp um allt, hélt á nýfæddum lömbum, stjórnaði hundinum, pabbanum, mömmunni en áttaði sig á því að enginn stjórnar bóndanum með stóru Béi. Sigga Bára og Ævar skilja hvort annað og hann bauð henni í hennar fyrstu ferð í traktor. Það var ævintýri og sóttu þau kind og tvö lömb hennar sem höfðu fæðst fyrr um daginn. Já það eru glaðar dömur sem eru sofandi núna og báðar búnar að ákveða það að Hvammur er staðurinn sem heimsóttur verður aftur í sumar.
Takk fyrir okkur sæmdarhjón fyrir rausnarlegar móttökur fyrr í dag.
Bless í bú

Skírnardagur Auðar Eddu 7. maí




Það kom loksins að því að við létum skíra Audi Eddu Jin. Ótrúlegt hvað tíminn hefur flogið frá okkur en loksins rann upp þessi líka fallegi dagur. Skírnardaman klædd upp og var sko alveg tilbúin að láta skíra sig. Vaknaði snemma eins og vanalega og hafði fengið að horfa á Dóru meðan við hin tókum okkur til. Var ekki alveg á því að hætta að horfa, Pabbi settu á „tásu“ sagði sú stutta sem hafði heyrt stóru systur slá um sig með ensku orði sem er mjög svipað. En þegar í skírnarkjólinn var komið tók hún ekki annað í mál en að fara á hlaupahjólinu í kirkjuna. Við reyndum að finna einhverjar haldbærar skýringar til að koma í veg fyrir það því innst inni áttum við von á því að hún myndi detta á leiðinni. En þetta var hennar dagur og hún mátti sko bara alveg ráða þessu. „Já farðu bara á hlaupahjólinu og láttu skíra þig“ sögðu foreldrarnir og áður en setningunni var lokið var hún lögð af stað. Prestinum honum Bjarna þótti þetta líka frekar flott, hann hafði amk aldrei áður skírt barn sem hafði komið á hlaupahjóli til sín. Við teljum þetta bara dæmigert fyrir Auði Eddu, hún er bara þessi ótrúlega skemmtilega, uppátækjasama stúlka. Athöfnin var sérstaklega falleg og skemmtileg. Brói spilaði á píanoið og allir sungu auk þess sem Sigga Bára stóra systir spilaði svo fallega á fiðluna ekkert smá flott hjá henni og gaman að eiga svona stóru systur.


Allt gekk vel í veislunni og börnin voru mest úti að leika á milli þess sem skotist var inn til að fá smá góðgæti og svo aftur út. Takk fyrir dásamlegan dag.

sunnudagur, apríl 24, 2011

Gleðilegt páskaegg


Já svona óskaði Auður Edda öllum gleðilegra páska þessa fyrstu páska okkar saman. Það var mikl spenna þegar báðar dömurnar voru vaknaðar í morgun. Sigga Bára svaf að vísu svolítið mikið lengur en litla systir en þegar Sigga Bára var komin á stjá hófust páskarnir. Hún gerði ratleik fyrir foreldrana af svo mikilli snilli, örugglega 7 vísbendingar alveg ein, svo fóru systurnar í það að leita að páskaeggjunum sínum og þegar þeirri leit lauk hófst heljarinnar nammiát á fastandi maga. Svo þegar klukkan var að nálgast ellefu var skundað niðrí Húsdýragarð á árlegan páskasunnudagsskóla þar sem systurnar sungu af mikilli innlifiun og fengu að klappa páskakanínum. Sigga Bára fetaði í fótspor pabba og var tekin í sitt fyrsta sjónvarpsviðtal sem er hægt að finna hér
Um kvöldið kom svo Siggi Valur frændi og borðaði með okkur en í eftirrétt var framreidd kaka að hans ósk sem Sigga Bára bakaði og Auður Edda fékk að klára kremið úr skálinni - mikil samvinna hjá systrunun í eldhúsinu.
Núna er litla ljós sofnuð en stóra ljós vakandi og langar að horfa á hundamynd - það verður því kósýkvöld í kvöld.
Bless í bú

laugardagur, apríl 23, 2011

Gleðilegt sumar - Snillingurinn hún Auður Edda byrjuð að teikna


Mamma og pabbi eru svo stolt af því að Auður Edda er farin að teikna svo snilldarlega flott - vá hvað það var klappað og núna er hún að teikna alla fjölskylduna á sama blaðið. Við sáum að Sigga Bára kom með sýna fyrstu "Óla prik" mynd um 2 og hálfs árs aldurinn svo hefur stóra systir sem alltaf er að teikna verið mikil hvatning fyrir Auði Eddu.
Við erum búin að vera með Olgu og fjölskyldu um helgina og þangað hafa margir ættingjað komið. Krakkarnir leikið lausum hala úti svo glöð og sæl. Á morgun er páskadagur og mikill spenningur að vakna og leita og borða SÚKKULAÐIegg
Bless í bú

miðvikudagur, apríl 20, 2011

Síðasti vetrardagur árið 2010 var dagurinn sem við fengum upplýsingar um Auði Eddu Jin

Það er eins og gerst hafi í gær þegar mamma og pabbi fengu hringingu frá Íslenskri ættleiðingu á síðasta vetrardag þar sem okkur var tilkynnt að lítil falleg stúlka yrði okkar! Dagurinn var fallegur, sól og hamingja. Stóra systir stóð þá á stóra sviðinu í Háskólabíói og söng með rúmlega hundrað leikskólabörnum falleg íslensklög á meðan mamma og pabbi voru við það að springa af spenningi yfir öllu sem í gangi var. Snilldar setning Siggu Báru þegar hún frétti af litlu systir sem biði úti í Shanghai voru svo rétt og sönn""Það eru milljón hjörtu inni í mér núna. Jörðin er hjarta og pláneturnar eru hjarta"


Það eru ekki til heppnari og hamingjusamari foreldrar en við
Bless í bú

mánudagur, mars 14, 2011

Systurnar gistu hjá ömmu og afa

Sigga Bára og Auður Edda gistu síðasta laugardag hjá ömmu og afa þar sem foreldrarnir fóru á Food and Fun með Bróa, Eddu, Bínu og Geira. Kvöldið var frábært hjá þeim systrum, vöktu fram eftir öllu og hafa ráðið algjörlega yfir dagskránni hjá ömmu og afa. Auður Edda var að gista í fyrsta sinn án mömmu og pabba og var það minnsta málið enda hverjum leiðist með svona skemmtilegri stóru systir sem er alltaf að leika við hana, kenna henni að dansa, syngja, lita og allt það sem lítið fólk þarf að læra í lífinu. Takk amma og afi fyrir frábæran sólarhring!
Siggu Báru gengur vel í skólanum og fékk góðan vitnisburð, les núna 104 atkvæði sem þykir mjög gott fyrir 6 ára, er ekki alltaf þæg (sem mömmu finnst flott og er stolt af) en tekur leiðsögn og bætir sig í masinu, þ.e.minnkar það :-D Svo er hún líka afspyrnu góð í fiðlunni, æfir sig samviskusamlega en þó sjaldnast að eigin frumkvæði enda eðlilegur krakki hér á ferð. Hún spilaði á tónleikum fyrir viku sem gengu vel, bara ekkert hrædd við að koma fram - þarna er hún lík pabba sínum.
Auður Edda er hamingjusöm í skólanum, höldum að hún göslist aðallega með strákunum þar sem hún er farin að sýna karate spörk hér heima sem er bara snilld. Svo er hún svo ákveðin, brosmild, uppátækjasöm og lifandi - minnir okkur eiginlega á Emil - vill vel en svo mistekst bara sumt og þá segir okkar bara "Mamma tetta bara alltilagi" og gerir snilldar svip.
Svona er þetta líf - bara skemmtilegt.
Bless í bú

mánudagur, febrúar 14, 2011

Hestar og fleira skemmtilegt


Það  er nú orðið nokkuð langt síðan við settum inn nýjar upplýsingar inná  síðuna  okkar. Afmælisveislan hennar Auðar Eddu gekk vonum framar og sú stutta var ánægð með daginn og ekki var gleði þeirra systra minni um jólin. Auður var reyndar hálf fegin þegar henni var sagt að jólasveinninn væri farinn aftur til fjalla. Gott að losna við þessa kalla úr byggð.
Farið er að síga á síðari hluta janúarmánaðar sem hefur verið viðburðaríkur hjá okkur. Mikið að gera afmælisveislur og ekki má gleyma upphafi skólagöngu hjá Auði Eddu sem byrjuð er í leikskóla. Hún er alsæl í skólanum og leikur við hvurn sinn fingur eins og sagt er.
Um helgina fóru við í heimsókn til Ásu og Gríms í hesthúsin en Sigga Bára hefur verið heilluð af hestum um nokkurt skeið. Og óhætt er að segja að heimsóknin í dag haf bætt um betur. Sigga fékk að fara reiðtúr með Ásu og sú var nú stolt á hestinum og hafði líka áður mokað út og aðstoðað við að setja hnakk og beisli á hestinn. Auður Edda fékk líka að setjast á bak og fannst gaman en vildi samt láta halda í sig, ekki alveg örugg með þetta.
Nú að lokum var að koma í ljós að Sigga er að fá þessar fallegu fullorðins framtennur. Frekar stolt enda fullt tilefni til.
Við reynum að vera duglegri að setja inn nýjar fréttir

sunnudagur, desember 19, 2010

Afmæli í dag






Það er búin að vera viðburðarrík helgi hjá okkur á Hofteigi. Hápunkturinn auðvitað að Auður Edda Jin átti 3 ára afmæli í dag 19. desember. Við tókum föstudaginn í lokaundirbúning en mikil undirbúningur hefur átt sér stað á heimilinu undanfarna daga og vikur. Það var sérstakt markmið okkar að hafa sem mest heimagert á boðstólum. Ákveðið hafði verið að taka forskot á sæluna og halda veisluna degi fyrr. Laugardagurinn rann upp frekar snemma og þá var hafist handa við að skreyta afmælistertuna og var fengin sérstök ráðgjöf frá Hrund við það verkefni og ekki sjáum við eftir þvi. Úr varð hið myndarlegasta jólatré, sem skreytt var með rauðum borðum og fullt af pökkum sem Sigríður Bára tók að sér að skreyta líka. Gesti tók að streyma að síðdegis og var mikið fjör hjá Auði enda „aueddaammalidaaag“. Eftir ljúfa afmælissöng undir öruggri stjórn Sigga Vals heyrðist mikill hávaði að utan og kom í ljós að Hurðaskellir var að leita inngönguleiðar í húsið öllum ungviði og mæðrum til mikillar gleði. Heimsókninn féll almennt í góðan jarðveg en afmælisbarnið sjálft virtist ósköp fegin þegar sveinninn fór brott og andaði léttar í kjölfarið. Hjónin á bænum voru bara nokkuð þreytt á því eftir annríkið og strangan dag og áttum verðskuldaða GT stund fyrir svefninn.

Afmælisdagurinn sjálfur rann síðan upp ekki síðri og eftir góða fjölskyldustund var haldið í sunnudagaskólann þar sem afmælisbarnið fékk að njóta sín undir góðri leiðsögn Siggu Báru. Halla Elísabet frænka kom síðan í heimsókn eftir kirkjustundina og náðu þær að leika sér vel saman og undirbúa sig síðan undir jólatréskemmtun með afa Val og ömmu Ernu. Það vantar ekki liði í dagskránna þessa dagana. Hjónin gátu leyft sér að ganga í kuldanum í miðbænum, skoða í búðir og láta sig dreyma, barnalaus í tvo tíma eða svo. Kvöldinu lauk síðan með myndarlegri matarveislu þar sem afi og amma og Erna Hrund komu til veisluborðs. Um að gera að taka smá forskot á jólaátið, þetta verður hvort sem er svo stutt „ þessi jólin „ Takk fyrir allar kveðjunar og gjafirnar kæra fjölskylda og vinir.

Mamma, pabbi og Sigga Bára eru mikið þakklát fyrir yndislegu afmælisdraumadísina!

Bless í bú

miðvikudagur, desember 01, 2010

Súkkulaði í morgunmat, klipping og hátíð í skólanum.





Það var eins gott að Sigga Bára var vel vakandi í morgun en það munaði engu að foreldrarnir hefðu gleymt því að láta dömurnar opna súkkulaðidagatölin sín. Mikið þótti þeim gott að fá sér mola svona í morgunsárið enda dætur mömmu sinnar. Auður Edda fór svo í sína fyrstu klippingu hér á landi og kom hún mömmu sinni mikið á óvart með því að sitja kyrr í stólnum og kurteisin uppmáluð enda vissi hún upp á hár að hún var í "bjútí trítment" með naglalakk á fingrum og tám. Um hádegið var svo arkað nýklippt og flott í skólann til Siggu Báru þar sem skólinn fékk umhverfisstaðal í dag og var sungið, trallað og kökur í boði. Eins og þetta hafi ekki verið nægjanleg gleði yfir daginn og jafnvel vikuna þá komu Blómvangssystur í pössun, Kristín mamma þeirra svo í heimsókn og að lokum afi og amma sem komu færandi hendi. Núna hangir líka heimagert jóladagatal fyrir systurnar með fallega innpökkuðum pökkum hangandi á hringjum. Það verða viðbrigði að vakna þann 25. desember þegar dömurnar hafa verið vandar á svona dekur.
Bless í bú

fimmtudagur, nóvember 18, 2010

Bláfjöllin í fyrsta sinn og bara gleði sem ríkti










Mikið ótrúlega var gaman í gærdag. Pabbi var í fríi, Sigga Bára var í fríi og allir saman í stuði!! Morguninn hófst á því að mamma fór með Siggu Báru í foreldraviðtal í skólanum. Það gekk svona vel og daman er að standa sig með stakri prýði bæði námslega og félagslega - það er ekki hægt að óska sér meira og erum við foreldrarnir mikið stolt af dömunni okkar. Svo var farið með skottu litlu hana Auði Eddu í sprautur en því var svo slegið á frest í bili. Nema hvað svo var brunað heim, borðað, smurt brauð, hitað kakó á brúsa og brunað í Bláfjöllin. Sigga Bára söng alla leiðina og svo söng Auður Edda á bakinu á pabba í brekkunum. Frábær dagur og skíðavertíðin byrjar vel hmmmm krossum fingur.
Bless í bú

miðvikudagur, nóvember 10, 2010

Hamingjudagurinn

Þessi dagur í dag hefur verið langþráður hjá Siggu Báru enda gengið undir nafninu Hamingjudagurinn. Hún var löngu búin að ákveða fötin sem hún ætlaði að vera klædd í á hamingjudaginn, hvernig hárið myndi vera og allt annað þaulskipulagt. Hvað var svona merkilegt við hamingjudaginn? Jú það var fyrsta bekkjakvöldið - já bekkjakvöld. Mætt var klukkan 18 og leikið og borðað í tvær dýrmætar stundir. Svo var farið að skipuleggja vinahópahittinga en sá fyrsti verður næskomandi föstudag. Þetta er svo gott fólk sem standa að baki þessum frábæra bekk og börnin bara snilld.
Auður Edda var heima á meðan mamma, pabbi og Sigga Bára fóru á bekkjakvöld. Hún var í góðum félagsskap ömmu, afa og Ernu Hrund, saknaði foreldra ekki mikið enda var farið í bað og naglalökkuð ásamt fleiru. Ingvar vinur kom í dag og það var hlegið og hoppað í rúminu af fullum krafti - þau eru snilldin ein saman þessi tvö og svo eru þau farin að tala svona líka mikið saman, þessir snillingar.
Jæja meira síðar
Hamingjudagskveðjur til allra - til hamingju með daginn!!!
Bless í bú

þriðjudagur, október 19, 2010

Það hafa liðið þrír mánuðir


Það eru liðnir þrír mánuðir í dag frá því við fengum Auði Eddu í fangið. Þessir þrír mánuðir hafa liðið hratt um leið og okkur hefur fundist hún hafa verið hér hjá okkur frá því hún dró andann fyrst í þessum heimi. Auður Edda Jin hefur haldið sínum karakter og ef eitthvað er bætt miklu kryddi í hann síðustu vikurnar. Hún er alltaf glöð, vaknar svo sæl og þyrstir í nýjan dag svo mikið að hún smitar alla hér heima þannig að ef einhver hafi einhverntímann verið þungur á morgnanna þá heyrir það sögunni til. Svo er hún farin að syngja nokkur lög og eitt þeirra hefur stóra systir kennt henni en það er HM lagið í fótbolta - tær snilld með kínverskum hreim.

Systurnar eru miklir vinir, Sigga Bára er mjög natin við hana og mikil hetja í okkar augum. Það getur ekki verið auðvelt að fá allt í einu þriggja ára skottu inn í lífið manns, eina sem veit hvað hún vill og sækir fast að því að ná sínu fram. Sem verðlaun hefur Sigga Bára fengið nokkuð oft að vaka lengur og þá er dekurstund fyrir prinsessuna stóru - í kvöld voru lakkaðar neglur á tám og fingrum auk þess sem smá lakkrís var maulaður á meðan herlegheitin þornuðu. Svona á lífið að vera.
Bless í bú

þriðjudagur, október 05, 2010

Nokkrar myndir fyrir þá sem hafa kvartað undan myndleysi á vefnum.



Posted by Picasa

Haustið komið en bara sumar í hjarta


Það er ótrúlegt hvað tíminn líður þegar það er gaman. Dagarnir hér ganga sinn vanagang að mestu en þó er enginn eins þegar dæturnar eru annarsvegar. Auður Edda Jin er kraftmikil stúlka sem er alltaf að vinna. Gengur hér um heima hjá sér með nokkra poka fulla af allskonar dóti, flytur það á milli staða, tekur það upp og endurraðar - þetta er ritual sem tekið getur klukkustund ef ekki meira. Hún er líka farin að tala alveg ótrúlega mikið og söngla lög á íslensku með sínum fallega kínverska hreim og takti.
Sigga Bára er dugleg í skólanum og líður vel þar, kemur glöð heim á hverjum degi, vill eiginlega sjaldan koma heim þegar hún er sótt því félagarnir eru svo skemmtilegir. Ein tönn í viðbót fauk þegar mamman var að tannbursta hana einn morguninn, þessi mjúka mamma!!
Setjum hér nokkrar myndir af þessum gersemum sem eru orðnar svo góðar vinkonur og hrein unun að fylgjast með þegar Auðru Edda skriðdreki vekur stóru systir á morgnanna - þær eru snilldin ein!!
Bless í bú 






Posted by Picasa

sunnudagur, september 19, 2010

Enn ein tönnin farin úr stóru systur og Auður Edda reynir að losa nokkrar úr sínum munni










Hér líður tíminn hratt og ekkert verið sett inn á þessa síðu í nokkrar vikur. Sigga Bára hefur misst enn eina tönnina og hún Auður Edda reynir sitt besta til að ýta á sínar tennur svo þær fari nú að losna. Þær systur eru svo góðar vinkonur og nýtur Sigga Bára þess mikið að eiga sér hinn fullkomna aðdáenda sem sér ekki sólina fyrir henni. Búið er að fara í veiðiferð með Hemma, Þóru, Magga Val, ömmu og afa sem var frábær þó enginn fiskur hafi komið með heim. Skólinn gengur vel hjá Siggu Báru og mamma og Auður Edda eru duglegar að flækjast um á daginn í góðum félagsskap.
Það verður líka að koma fram að Auður Edda hefur þyngst um eitt kíló frá komu og lengst um einn sentimeter sem við erum auðvitað bara ánægð með.  Það væri gaman ef allir í fjölskyldunni yrðu glaðir með þyngdaraukningu!!
Bless í bú
Posted by Picasa